Hmanlai ata tawh, hnam ang pawhin Mizote hi pianphunga rual banlo (Vohbik) te chunga lainatna lantir thin, “piansual leh phar charin tlai luat a nei lo” tia pianphunga rual banlote hmusit leh endawng lo tura inzirtir thin, rual an ban loh vanga an tihphung zir ringawt pawh thiang lo leh mahni chunga thleng ve thei a nih dan inzirtir thin kan ni.
Khawvel hmasawnnain min luhchilh thuk ang zelin vohbikte chunga rilru put hmang leh enkawl danah pawh a tha zawngin hma kan sawn a, mihring nunhona-ah pawh dah hniam mai loin, mi bik, duhsakna leh lainatna nena enkawl leh kaihhruai ngai an nihna kan hre chiang telh telh a, mi nawlpui pawhin hmangaihna leh khawngaihna rilru pu chunga lainatna kan lantir thin hi a ropui tak zet bawk.
Vohbik kan tihte enkawl dan leh kaihhruai dan hian an hma hun thi tak a hril a, hemi chungchangah hian chhungkua mai ni lo, thenawm khawveng leh khawtlang ang pawha tanlakna tur erawh kan la nei mai thei. Mi pangngai theih ang an thei lo chung pawha an theih tawka chhawr tangkai dan ngaihtuahte, an theih tawk zirtirna pek te, chhungkaw tana kawng khat tala tangkai thei tura kaihhruai a pawimawh a, chu chu chhungkua atang ringawta inzirtir hlawhtlin theih a ni lo. Thenawm khawveng leh khawtlang anga kan tanrualna tur a ni ang. An rualbanlohna hmuh kana, an theihna zawnah fuih phur chunga enkawl leh kaihhruai an nih hian chhungkaw tana mi tangkai tak an ni thei tih kan hriat a pawimawh. Hetiang anga mi hman tlak, rin tlak leh chhawr nahawm hmuh tur an pung mek a nih hi.
Hetihlai hian, kan thalai zingah pianphunga rual khum, fuke kim, ngaihtuahna fing pui pui nei, Pianphunga rualbanlo nia kan ngaih leh kan hmuh thin tam takte aia chhawrnahawm lo zawk, khawsak phunga rualbanlo, chhungte chawm hlawm, chu pawh la kham lo, Vohbikte ai maha ven uluk ngai, chhungkua leh khawtlang tan pawha “buaina ral lian” tia sawi tur an tam ta. Hei hi a pawi a, hnam ang pawha kan hmai tibaltu an ni a, hetianga rualbanlo an pun zel lohna tura tan lak, kan inenkawl dan her danglam hret hi kan mamawh a nih a rinawm.
Hei mai hi a la ni lo, mi thiam leh fing pui pui, mi pangngai chung lam, pawisak nei lo, thawhrimna tello leh tawngkam thiam hmanga hausak tum, ram,khawtlang leh mipui hmatheha hmanga mahni inhai vur tum tlat,chumi an tih theihna tura tuang tichhah chunga nihna um ngar ngar, sawrkar term khat chhunga mi chunga len hman tum tlat, zahawm aia zahpuiawm nih thlang ngam,sual leh tha lo doa huaisen taka din aia fello leh tha lo pawh sawimam thei khawpa huaisen an pung zel. Hetiang mi hi pian phunga rualbanlo te aia piangsual an ni.
Thalai, nun kawng dai pelh palh ten harh fim mang loa pawi tenau an khawih ai maha ngaimawh awm zawk chu - harh fim lutuk chunga ram leh khawtlang hmasawnna tithuanawp khawpa pawi lian khawih pawisa lote hi an ni a, pianphunga rual banlote aia ven ngun ngai, rual ban lutuk mihring kan tam ta.
Pianphunga rualbanlote dinhmun chawikang turin theih tawp chhuah ila, pawisak leh zahpah nei lo khawpa mi pangngai chung lamte zahawmlohna tilang ngam khawpin huaisen ang u hmiang.
0 Comments