Bairabi atanga NH 44A/108 pawh tur, Mamit khua hela kawngpui kal tura NH 6 (Spur) hnathawhna tura ruahman awm chu hmalakna engemaw chen kalpui a nih tawh laiin hna thawh tak tak hun tur erawh sawi theih a la ni lo.
Hemi chungchangah hian nimin Ni 24/3/2026 khan MJA Mamit District meberte chuan Pi Carolyn L.B. Khiangte, Competent Authority for Land Acquisition (CALA) NH 6 (Spur) chu a pisa ah kawmin hmalak tawh dan leh harsatna awmte an sawipui a, kawngpui atana ram lak tur chin chhinchhiah hna (Assesment) kalpui tawh pawh a bul atanga a vaia tih that leh vek tur a nih thu Pi LB Khiangte chuan a sawi.
Pi Carolyn LB Khiangte, CALA NH 6 (Spur) chuan he kawngpui siamna tura ram lak tur, a hmaa assesment lo tih tawh chu Ministry lamin an pawmpui theih loh avangin assesment hi tih that leh vek a ngai dawn a, tunah hian hmun sawm hnih chuang zet chu tih that tawh niin a vaia tih that leh vek tur a ni dawn a, hemi chunchangah hian vawiin hian a kaihhnawih sawrkar department mi pawimawh te nen vawiin hian an thukhawm dawn tih sawiin hmalak chhunzawm dan tur kimchang erawh sawi mai theih a la nih loh thu a sawi a ni.
He kawngpui siamna tura pawimawh hmasa (AAA), ram lakna tur atana sum mamawh zat, sum pek chhuahna tura pawimawh hrang hrang Ministryin a pawmpui tura rawtna (draft) chu MoRTH ah vawi hnih thawn a ni tawh (portal kaltlangin) tih sawiin hei hi siamthat ngai awm leh pawm theih loh a nih a vanga rawn thawn let leh a nih thu CALA chuan a sawi.
He kawngpui siamna tura sum ruahman leh ram lak tura sum sen tur zat niawm tak, dik lo tak social media lama a darh chiam chu pawi a tih thu Pi Carolyn LB Khiangte chuan a sawi a ni.
Bairabi to NH 44A/108 kawngpui (NH 6 Spur) siamna tur hian cheng vaibelchhia 655.95 ruahman a nih laiin ram lakna tura sum mamawh tur anga chhut chhuah chu Cheng vaibelchhia 659 zet a ni thung.
 Bairabi to NH 44A/108 hmalaknaah bul tan that leh ngai a awm){kind=link}
0 Comments