Mamit District chhunga inkalpawhna kawngpui hrang hrang siamthat, tih zauh leh hnathawh zawh loh thawh zawh tura ruahmanna awm te ngawrh taka umzui zel a nih laiin heng kan kawng pawimawh - NH 44A hna thawh zawh loh thawh zawhna tur, NH 44A peng thuam (Luangpawl) atanga GSA Playground thleng siamna tur, NH 44A kawng hlui thawm thatna tur leh Bairabi - Mamit double lane siam hna thawh turte hi hna tan theih hun tur sawi theih a la ni lo.
National Highway 44A/108 hnathawh zawh loh thawh zawhna tura ruahmanna kal mekah tun dinhmunah Tender koh tawh niin chhangtu engemaw zat an awm a, MoRTH lam atanga pawmpuina lak ngai eng engemaw a la awm avangin Tender hi hawn theih a la ni rih lo tih Pu PC David Lalrinliana EE MPWD Highway Division I chuan a sawi.
Bairabi - Mamit National Highway No 6 (Spur) double lan siamna tura hmalakna kal mek pawh chak taka umzui mek niin tunah hian ram lak tur leh senso ngai tur zat ennawn mek a ni a, hei hi zawhfel a ni hunah final DPR theh luh theih chauh a ni ang. He kawngpui siamna tura sum mamawh angte hi kum 2025-2026 sawrkar kum kal mekah chuan hmuh hman an inbeisei tih Pu Davida chuan a sawi bawk.
SASCI atanga hnathawhna tur sum Rs 9.89 Cr. ruahman fel tawh, NH 44A pengthuam Luangpawl atanga GSA Playground thlenga laih zauh leh siamthat hna thawk tur hian umati Creative Infrastructure Pvt Ltd. Flat No 310, Ganeshalat Appartment, Jharudih, Bekar Bandth, Dhanbad, Jharkhand-826001 chu thlan fel an ni tawh a, anni hian hmala mei thei turin an inbun mek a ni. He kawng siamthatna tur hian mimal leh sawrkar ram engemaw zat a la hek dawn a, heng eng fel leh kawngpuiin a huam tur chin chhinchhiah hnathawh hi tunkar chhung hian tan hman beisei a ni. Hei hi tihfel a nih chuan helai kawng siam hna hi thawh mai theih tur a nih thu MPWD Highway Division I thuneitute chuan an sawi.
Hetih lai hian, Mamit leh Bairabi inkar kawngpui chhe lutuk thawm that hna thawh mek a ni a, STMC hmanga an sum hmuh, an khek hram hram atanga thawh a nih thu leh sum hmuhin a daih thin loh vanga ba erawh an ngah thu Pu Lalnunhlua SDO NH Division I chuan a sawi a, STMC thar hmanga hnathawhna tur ruahmanna kalpui mek a nih thu a sawi bawk.
0 Comments