Mamit khawpui chhunga tlawmngai Pawl hrang hrang leh Political party aiawh tukin (Ni 15/8/2025) zinga thukhawm chuan P&E Mamit Division a E.E. mawhphurhna chelh mektu, Er. Jacob Lalrinfela sawn chhuahna tura tun hnaia sawrkarin order a tihchhuah chu sut leh tura theih tawpa sawrkar nawr/ngen nise tiin an rel.
Tukin a pawl hrang hrang thutkhawmah hian Mamit leh a chhehvel khua te power supply dinhmun leh 132kv line hnathawh mek leh hmachhawp awmte ngun taka thlir chhungin, Mamit District tana rotling tur hna hautak tak thawh mek leh hmachhawp tam tak a awm thu an sawi a, heng hna hrang hrang enkawl tur hian tuna E.E. mawhphurhna la mektu hi a tha tawk a, hmun danga sawn chhuak rih lo tura hmalakna kalpui chu a tul hle nia an hriat thu an sawi.
Pawl hrang hrang aiawh thukhawm chuan thutlukna mumal tak siamin, sawrkarna chelh mektu ZPM Party a ziaktu lian (Secretary General) vawiina Mamita lo kal tur chu lo hmuh a, thil awm dan sawipui nise an ti a, sawrkarah lehkha thehluh nghal an tum bawk. Hemi atanga an duh ang beisei tur a awm lo a nih chuan karleh Thawhtanni (Ni 18/8/2025) ah sawrkar thuneitute dawr turin lam kal, pawl hrang hrang aiawh intirh nise tiin an rel a ni.
Tlawmngai Pawl hrang hrang leh political party aiawh (NGOCC) ten ngun taka an ngaihtuah hnua Mamit khua leh a chhehvel tana tha tura thutlukna an siam chu ngaihpawimawh sak turin sawrkart an ngen a, a tul ang zela hmalakna kalpui an tum.
0 Comments