Fur ruahtui tlak leh kawng chhiat a innang fuh tawk chiah kumtin a, englai maha beisei ang kawng tha nei ngai lo State in kawng chhiat ber kum kan thleng nia an sawi laia kawng siamna tur sum neih mumal loh a inrual leh zel a, chu vang chuan mipui nitin mamawh hrang hrang lakluh kawngah harsatna a thleng chho mek a ni.
State chhung kawng mai nilo, State dang nena inkalpawhna kawngpui zawng zawng a chiau kawi nal hlauhawm em em vek a,mawhphurtu nih hlauin kawh tur kan zawng kual sup sup ringawt mai a ni.
Ramri buai nei reng kan nih vanga State pahnih inkara inhmuhmawhna boruak sosang a awm apiangin kawng dang reh leh kawngpui tha tam tak neih a tul thu kan aupui fo a, muang leia kan awm tikah a tulna awm kan hmuh kan leh thin. Mamawh lakluhna kawngpui pawimawh ni tur pawh pamtul thak ngai khawpin kan State chhunga hnathawktute thunun hlei thei lo khawpin ram hruaitu leh sawrkar hnathawk liante an hnuaiah an intuluta, an dik lohna leh an tihsual siamthat tuma na tak leh awmze neia beih aiin an tihsual an zeppui mawh hek lo.
Mihring hmasa ten Eden huana an bawhchhiat vanga vawiin thlenga mihring lo piang chhuak apiang chhandam ngai kan ni ta ang hian, hman atanga kan tihsual tawh chuan thangthar lo awm zel thlengin min la vaw zui reng a, kan tih ni hauh lo sual vanga chhandam ngai dinhmunah kan State rethei tak hi a ding mek. Hei hi thudik a ni a, kan pawm ngam a ngai.
Kan vawiin dinhmun mek thir ang. Mizoram leh mipui chhan chhuak theitu tur mipuiin an zawnga, beiseina sang tak nen thuneitu thlak an ni. Kan kawngpui dinhmun bikah, reilote chhunga siamthat thut a harsa ang tih a hriat. Kumin fur chhungin tun aia tha zawk beisei tur a vang mai thei. Thal laia fur hun kan ngaihtuah thlen loh vang a ni bawk. Harsatna leh manganna tawh laia kan inhmuhchhuah fona hi umzui ila, kan zia ang. Chu chu nasa zawka tanlak a tulna a ni.
Tin, mawhphurhna la ngam lo anga ngaih theih tura thuneitu lam atanga sawi hriattur awm fo hi mipui beisei a ni lo. Vawiina kan hrawn mekte hi a chhe lai siamtha theitu ni tura mipui beisei an ni zawk. “Anni hunah pawh” ti fo loin, siamthat tuma an beihna awka hriat leh a taka an thawhrimna hmuh hi mipui beisei a ni.
Kum te han vei leh sela, vawiin dinhmun ang thoa lirthei tlanna tlak mang loh kawngpui nei chunga furpui min hmachhawnpui leh a nih chuan kan sawrkar thuneitute laka mipui beiseina leh rinna hi nasa takin a tlahniam dawn, mipuiin politics kawngchhia-ah an hnuk lut ve thung ang a, inhai chhuak tura an beih ve hle a ngai tawh ang.
State puma kan kawngpui dinhmun ngun takin thlir sela, kawngpui enkawl kawnga mawhphurhna la ngam lo an awm emaw, awmze nei zawka hmalakna kalpui ngaihna an hre lo a nih chuan inthlak danglam ngam rawh se.
0 Comments