Kum 26 lai a ni ta, Mizoram chhunga thing tiak kan phun zawng zawng nuai 47 dawn atanga a zatve tal pawh hi dam khaw chhuaka puitling thei tur nise, tui hna tlem zel vanga harsatna kan tawh nia kan sawi tam tak hi a ziawm ngeiin a rinawm.
Kum 1999 atanga Green Mizoram Programme puala thing tiak kan phun zawng zawngte, hemi ni puala kan senso zawng zawng, sum leh pai, tha leh hun, sawrkar hnathawk leh tlawmngai pawl hrang hrang ten an hna tul an kalsan tam takte hi chhut vang vang ila, vawiina a hlawhtlinna nia kan sawi leh kan hmuh mek nen hian a inhen in kan hria em ?
Hei chen, heti zat thing tiak kan phun tawh atanga kan phun hlum leh rilral ta mai mai hi a tam tawk ta viau a, thingphun tura thawk chhuak tam tak zingah sawrkar thuneitu ten tihtur an tih avanga tih loh theih loha ngai, heti ngawt lo deuha kawng dang zawn tul ti leh hun ti tawh, awmze nei zawk leh chhawrnahawm zawka he programme hman a nih theihna tura “ngaihtuahna thar hman a ngai a ni” titu an tam hle. Helam hawi hian sawrkar thuneitu ten ngaihtuahna hmang sela, zirchianna neiin ruahmanna tha zawk, tam zawka ramin a chhawr theih tur, sum leh pai, hun leh tha tam tak kan senral avanga a hlawkna letleh hmuh ngei a ni theihna tur kawng an ngaihtuah chhuah a hun ta niin a lang.
Vawiina kan kalphungah, thing tiak phun pelh a tangkaina leh a rah chhuah tur lam aiin phun hlum leh enkawl zui loh vanga riral tam lutukte, insen thlawnna tam lutuk lam hian a phuntute rilru a hneh zawk tawh a, ho riaua hriatna a awm a, thing tiak phun belh tulna leh hlutna lam ai mahin he ni denchhena zalen deuh hleka hun thawl neih a, intihhlimna/intawllenna ang lekah an/kan ngai ta em ni (?) tih theih a ni. Ngaihtuahna thar hman a hun tak zet.
Tui hna siambelh, ruahtui luang ral puat tur lo man khawm turin thing tiak kan phun a, thing tiak phunna khua leh vengte tui tlan hnar lam kan bawh nat a tul hle bawk.
Tin, a zatve aia tam mah riral mai mai tura thing tiak phun kumtin ai chuan, kan phun tawh sate an puitlin theihna tura enkawl kawngah hmalakna thar neih a ngai. Kumina kan phun ho hi an puitlin theihna turin kum 4/5 te enkawl zui ila, chumi atan chuan sum ui lo ila, planting agency te kutah mawhphurhna dah ngam ila, kum tina thing tiak phunna atana kan senso zat hi kan seng hreh lo a nih chuan vawiina kan thing tiak phun puitling nia kan sawi aia tam fe hi an puitling ang tih a rinawm tlat.
Mamit District chhungah ringawt pawh thing tiak nuai hnih dawn kan phun ta. Thang khat lian zet a liam tawh, Chu tih lai chuan kan tuihna tlem zelte, sik leh sa danglam zelte, ruahtui tlak dan leh tui len dan awmze nei ta lo lutuk ten ziawm lam aiin zual lam a pan zel thung.
*“Kan tih dan ngai hi a tha e” tih ngawt emaw, thupui hrang hrang neih kumtin hian rah tha a chhuah ngawt lo a, kan tih tawh dan ngun taka zirchiang chunga a aia tha zawk leh chhenfakawm zawk ruahmanna thar kalpui thei tur khawpa ngaihtuahna sen a hun ta.*
0 Comments