Mamit District chhunga inkalpawhna kawngpui thenkhat, furpui han tawrhpui atana huphurhawm tak tak a awm a, hei hi kum tina mipuiin harsatna an tawh, vawiin atanga kan huphurh lawk, political party ten invawmna remchang atana an hman thin,an hun lai (vawiin thleng pawhin) theuha mipui beisei ang an thlenpui hleih theih chuan si loh a ni.
Kan inkalpawhna kawngpui thenkhat hi chu furpui thlen hmaa hnathawh tan hman loh tur leh diak kawi tak nena furpui tawrhna tur an ni leh dawn tih a hriat theih ruak awm e. Hetiang hi kan dinhmun a nih avangin, hun lo la awm turah innawr chiam chiam emaw, party inbeihna aw ring tak emaw, tlawmngai pawl mangang au thawm emaw hriat tur a awm lohna tura vawiin atanga ngaihtuahna hman leh ruahmanna tha neih a tul tak zet.
Sawrkar laipui sum hmanga hmasawnna hna lian tham thawk turin tih neuh neuh ngai, kal ruak ruak thei lo thil a tam a, chu chu mipui pawhin an hre thiam a, dawhthei takin an nghak hram hram thin. Chumi avang tak chuan “ngawi thei”, “ phunchiar lo”, “dawihzep” tihte pawh khawtlang fate hian kan hlawh phah hial thin reng a ni. Hetiang a nih vanga inpalzam ngawt emaw, innuthuri zuam ngawt emaw chu a dik bik lo mai thei a, kawtlang fate hi khua-leh-tui ve tho kan nih anga harsatna awm theite sukiang tura tanlak chu sawrkar mawh a ni ang.
Kan kawngpui dinhmun hi mipui nawlpui aiin sawrkar leh a enkawltu department ten an hrechiang viau zawk ang a, furpui lo thlen huna harsatna lian tak tak thleng thei pumpelh tura vawiin atanga tan lak a ngai. Thawm that ngai leh invenna tur thil a awm ang a, chung atana sum lo ruahman lawk pawh sawrkar mawh a ni. Mangang au thawm a rin hle hnua “pawisa a awm lo” tih emaw, “sum pawh tur kan zawng ang” tih emaw a ngaih lohna tura inhmakhua lawk a pawimawh tak zet. Party incherh thehna leh mipui mangang pen chhuak ten an nawr vanga a tihdan ngaihtuah hram ringawt hi sawrkar mualphona a ni tih hriat thar fo a tha awm e.
Kawngpui tha nei tura hmalakna mipuiin nghakhlel tak leh dawhthei taka an thlir mek lai hian, kan vawiin hun hi a pawimawh tel tih hriatreng tur. Kum 2026 furpui lo thlen huna kan kawngpui dinhmun a zirin sawrkar lakah tehna khai a ni dawn. Kan sawrkar kal mek hun hman tawh ngaihtuahin, heng atana sum ruahman lawk hi awm thei tura ngaih a ni tawh ang. Hun kal tawh ang bawka furpui thlen vanga mipui harsatna a thlenin, sutkian hna thawk hlei thei loa “ sum awm lo” “mihring indaih lo” khawl mumal lo” bawk min chhawp sak leh a nih chuan sawi mam tur a vang tawh mai thei a, sawrkar kalta mawhpuh a hun tawh lo ang a, sawrkar mek dinhmun a lo lang dawn a ni.
0 Comments