Mamit District chhunga inkalpawhna kawngpui pawimawh, siamthat ngai leh hmathar lak turte chak taka bawhzui reng a ni a, NH 44A/108 hnathawh zawh loh thawh zawhna tur leh Mamit-Bairabi kawng thawm thatna tur ruahmanna kalpui mek a ni.
Mamit District chhunga kawngpui (National Highway) lian ber, NH 44A/108 dinhmun dik tak hre turin naktuk Ni 26/3/2026 hian District Bawrhsap Suvigya S Chandra, IAS hoin department thuneituten a hmunah an tlawh ang.
NH 44A/108 hnathawh zawh loh thawh chhunzawmna tura Tender tihchhuah, contractorte chhanna hawn a nih hnuin Ni 24/3/2026 khan Ministry of Road Transport & Highway (MoRTH) chuan Technical Bid a enfel tawh a, kar khat hnuah Financial Bid hawn leh nghal theih beisei niin hemi hnu hian hnathawktu tur (Contractor) thlan fel theih beisei a ni.
Mamit leh Bairabi inkar kawng, NH 6 (Spur) double lane siamna tura hmalakna beisei anga kalpui ruak ruak theih a ni loh vang leh hun a la duh dawn vangte, tun maia mamawh hmasa kawng thawm that a nih vang leh Regional Officer, MoRTH thurawn angin he kawngpui awmsa thawm thatna (strengthening) turin ruahmanna siam a ni.
Tuna kawngpui awmsa thawm thatna (strengthening) atan hian PWD Highway Division chuan draft DPR/Estimate cheng vaibelchhe sawmriat MoRTH ah an theh lut tawh a, hei hi hmuh ngei beisei a nih thu Pu PC David Lalrinliana, EE PWD Highway Division I chuan Mamit Times a hrilh.
Hetihlai hian, Mamit leh Bairabi inkawng hi Short Term Maitainance Contract (STMC) hmanga thawm that hna thawh mek a nih thu leh NiDHI Creative Infrastructure Pvt. Ltd. ten an thawk tih EE NH Div. I Pu Davida chuan a sawi bawk.
0 Comments