Mamit vengthar huam chhung, chhuah lam ring road kawng ko fur ruahtui tlak apianga min thin chu a dawlna siam hna thawh tum mek a nih laiin a min leh.
Mamit vengthar huam chhunga Presbyterian Mamit Kohhran ram leh ring road inkar kawng ko chu nimin tlai dar 3 vel khan a min leh a, mihring tih palh erawh a nei lo. He lai hmun hi fur ruahtui tlak apianga min thin, ko sang leh min zel hlauhawm a nih vangin leimin dawlna tur Lungrem tum a ni a, lungremna thuthmun tur laih a nih laiin nasa takin a min a, mihring tawrhna erawh a thleng lo hlauh a ni. A bula lungrem zawh tawh, 5m a sang, 2m vel zeta thui leimin hian delh chim tel bawk.
Lungrem hna thawktu Pu Selbuanga chuan Mamit Times zawhna chhangin he lai hmuna lungrem tura bul tan that leh emaw, hnathawh chhunzawm emaw chu a ngamawm tawh lo nia a hriat thu a sawi. Kum 2025 December thla tawp lama hna thawh tan an tum atangin tun hi a vawi thum minna a ni tawh sawiin hnathawktu tan pawh a him loh theih avangin chhuzawm luih loh a that zawk a rin thu a sawi.
He laia hnathawh tura ruahmanna awm mek leh leimin thenfai, a min zel tur ven kawnga hmalak chhunzawm dan tur erawh sawi theih a la ni lo.
He laiah hian 65m a thui, 5m a sang lungrem turin SASCI atangin cheng nuai 64 ruahman a ni a, Contractor Pu H. Zorempuia niin a hnen atang hian mi pahnihin an thawk chhawng veleh a, pakhat thawh tura ruahman 32.5m chu rem zawh a ni tawh a, lungrem zawh tawh 2m vel zet chu nimina leimin hian a delh chhia a ni.
Helai lei minna hmun hi PWD thuneitute leh DM&R thuneitu ten vawiin lamah an enchiang ang.
0 Comments