Mamit District chhung inkalpawhna kawngpui chhe lutuk vanga mipui harsatna tawh sukiang tura sawrkar an ngenna chungchang ngaihtuahin zanin hian Tlawmngai Pawl hrang hrang leh Lirthei lian neitute an thukhawm dawn.
Mamita Tlawmngai pawl hrang hrang aiawhte leh lirthei lian neitu pawl chuan Mamit District chhunga inkalpawhna kawngpui chhe lutuk siamtha tura sawrkar ngenin Ni 12/10/2025 (Pathianni) thleng hun tiam an siam a, hemi hun chhunga sawrkar hmalakna leh sawrkar nena an indawrna chungchang sawiho turin zanin hian an thukhawm leh dawn a, hmalak zel dan tur an sawiho ang.
Hemi chungchangah hian, hun tiam an bithliah chhungin sawrkar lam atanga inbiakna emaw a awm loh thu Mamit Times thudawnna chuan a sawi.
Hetiang a nih lai hian NH 44A/108 hna thawh zawh loha chawlhsan (balance Works) thawh chhunzawm a nih theihna turin Tender koh mek a nih thu leh Tender chhanna hi Ni 31/10/2025ah hawn a nih tur thu Pu PC David Lalrinliana EE MPWD NH Division I chuan Mamit Times zawhna chhangin a sawi a, he hna thawh zawh loh thawh zawhna tur hian MoRTH atangin Rs 170.96 Crore pawm a nih thu a sawi bawk.
Sawrkar leh mawhphurhna neitu Department ten kawng chhe lutuk thawm that hna hi thawk ve reng bawk mahsela, Ni 24.8.2023 a hna tih tawp a nih atanga enkawltu mumal nei loa kum hnih awm tawh kawngpui chhe lutuk thawm that hna chu a chak theih loh thute, ruah sur reng vang leh lirthei tlan reng vanga hnathawh a lan hleih theih loh thu Pu Davida chuan a sawi.
National Highway -6 (Spur) double lane laih zauhna tur DPR 877.30 Crore chu Ministry of Road Transport & Highway ah theh luh a ni tawh a, tun dinhmunah Land Aquisition leh Forest Clearance buaipui mek a ni. He hna thawh a nih hmaa kawngpui siamthat hna thawhna tur Short Term Maintainance Contract (STMC) hmanga hnathawk tur zawnna tender koh tawh niin Ni 10/10/2025 khan tender hi hawn tura tih a ni.
National Highway 44A kawng hlui Lengpui Diverted road siamthatna turin Rs 10.80 Crore sanction a ni tawh a, contractor thlan fel a nih tawh thu Pu Davida EE MPWD NH Division I chuan a sawi a, heng bakah hian - Rawpuichhip Diversion, Dampui Diversion, Mamit Diversion (Mausen Road), Tuidam Diversion leh Tumpanglui Diversion siamna turin Rs 51.10 Crore sanction a ni tawh a, Tender koh tawh niin Ni 10/10/2025 khan tender hi hawn tur a nih thu Pu Davida chuan a sawi bawk.
Heng bakah hian NH 44A Luangpawl atanga Mamit luhna atanga GSA Playground thleng siam hna SASCI sum atanga thawh tura hmalakna pawh Hnathawktu tur thlan fel a nih tawh thu sawiin fur ruahtui tlak ziaawm hnuah hna tan tak tak theih beisei a nih thu EE MPWD NH Division I chuan a sawi a, tun dinhmunah kawngpui laih turin ram a lak tur chin chhinchhiah fel tura ruahmanna siam mek a nih thu a sawi.
0 Comments