Mizo Zirlai Pawl (MZP) leh Tuialhthei zuartute (AMPEDA) inkar-ah thu inchuh a awm mek a, inpuhmawhna chi hrang hrang a thleng zui mek a ni. A pawi hle.
Kan rilru put hmang leh kan kal dan, kan nunphung hrim hrim pawh inenfiah kan ngaihzia a lang chiang niin a lang. Tih luihna a ni emaw, a ni lo emaw pawh nisela, pawl hrang hrang ten kan intuamhlawmna tura sum kan tuak dan kan fimkhur deuh deuh a ngai niin a lang. Rim taka mahni thawh chhuah hmanga intunnun tum aia awlsam zawk leh mi thawhchhuah sa, mi neih sa hmanga intuamhlawm leh hmalakna kalpui kan tum fo hi kan bansan theih hun a nghahhlelhawm tak zet a ni.
Hetiang thil hi hmun hrang hrangah pawl hrang hrangten kan tihphung a ni fo. Pawl leh huho anga kan khawsak avanga engkim thiang leh pawina awm lo ang riaka kan ngai ta hi kan sim a tul. Mi mal tih nise nasa taka kan sawisel tur leh insuamna, inrawkna, hlemhletna lian tak ang hiala kan chhuah duh tur chiah pawh, pawl anga hmalakna a nih tak vanga sawimawi chawp ngai chunga sum tuak leh hmuh kan tum fo hi bansan kan tum a tul. Heti reng hi chuan kan hnam nunphung leh kan rilru put hmang diklo lutuk nia kan sawi fo hi engtik khawtikah mah kan insiam tha lo ang.
Thil pawimawh tak lo lang tel a awm a, chu chu Mizoram chhungah hnam dang ten mizo hming hawh leh an neihsa hmanga sumdawnna kalpui an awm reng tih hi a ni. Hetiang ang, dan hrula sumdawnna lian tham kalpui awm reng nia lang hi tihtawp a nih theihna tura sawrkar pawhin hmalakna a kalpui a tul awm e.
Tin, engemaw hleka hnam rilru chawk tho zawng emaw, hnam leh hnam, chi leh chi inkara inhmuhmawhna awm thei zawng emaw leh a infuihpawrh zawnga thu veivir chin loh a tul niin a lang a, harsatna neitute inkara chinfel theih mai tur thilah pawh, a tha lo zawnga nghawng lian zawk nei thei lamah kan inhruailut thei tih hriain fimkhur ang u.
0 Comments