Tun hnaia India ram chhunga inthlan (General Election leh By- Election) neih zawh takah khan Election Commission of India (ECI) chuan kawng hrang hrangah inelna a siama, heng zinga lawman pakhat hi Mamit District Election Officer leh a thahwpuite chuan an dawng dawn a ni.
Kum kalta 2025 kum tawp lama inthlan chi Election Commission of India in a buatsaihah khan kawng hrang hrang inelna siam a ni a, he inelna buatsaih zinga pakhat - Election Model Court of Conduct kenkawh chungchangah Mamit District Election Officer leh a thawhpuite chu ti ber niin Best District Election Award on Model Code of Conduct Implementation & Enforcement a dawng dawn a ni.
He chawimawina hi Ni 25/1/2026 (Pathianni) National Voters Day denchhenin Manekshaw Centre, Delhi Cantonment, New Delhi ah sem a ni dawn a, Chief Electoral Officer, Mizoram/Jt. Chief Electoral Officer Mizoram ten Mamit District Election Office aiawhin chawimawina hi an dawng ang.
Mamit District Election Officer leh a thawhpuiten he chawimawina an dawn chungchangah hian Pu Lalnunfela Chawngthu, Election Officer, Mamit District chuan Dampa bial inthlan neih zawh taka inthlan kaihhruaina hrang hrang kenkawh kawnga mawhphurhna neitu EEM member zawng zawngte thawhrimna rah a ni tih sawiin mawphurhna hlen chhuak tura theih tawp chhuahtu zawng zawng chungah lawmthu a sawi a, heng chawimawina hi mimal tih that vang emawa dawn theih a ni loa, a huhoa tanrualna leh thawhhona that vanga dawng an ni tih sawiin theih tawp chhuahtute thawhrimna vanga District-in hming that a khum chu lawmawm a tih thu a sawi.
0 Comments