Tangrual thiam apiang an chak thin

 Mamit District chhung kawngpui a chhe em em vek a, kawng hrang hrangin mipuiin harsatna an tawk a, mipui harsatna tawh sutkian aiin zual lam a pan zel niin a lang a, a loa awm theih loh thil lian thamah harsatna a thlen belh  zel hlauhthawnna a lian ta hle a ni.

District tlawh pawh theih loh dinhmuna ding mai thei kan nih laiin sawrkar thuneitu lam atanga hmalakna emaw, mipui thlamuanna tur thu emaw sawi rik hriattur a la awm lo a, vawiin thlenga kan hmuh leh hriat theih awm chhun chu eptu party lian pahnih - MNF leh INC ten kawng chhia an tlawh thu leh sawrkar demna leh ngenna thuchhuah mai a ni rih. Keimahni huang chhung kualte a in hrosak ringawt emaw, phun chiam chiam ringawt emaw hian awmzia a nei hlei thei lo tih a chiang a, chak zawk leh awmze nei zawka sawrkar thuneitu dawr tura feh chhuah ve pawh hun ta e. Kan sawi fo thin, sawrkar lai party chakna leh bialtu MLA tha chakna hmang kawpa tan lak nachang hriat a tha. District chhung MLA te nena tangruala kan/an tih tawh aia nasa zawka sawrkar nawr a hun tak zet a ni. Eptu MLA nih vanga ngawi tlat tur an ni bik lo a, an theihna zawng zawng sawm khawma an bial chhung hmasawnna thlen tura sawrkar nawr leh ngen ngawl taka kar ve hi an mawhphurhna a ni.

Vawiina eptu party ten an thil hmuh an sawi chhuah leh sawrkar an ngenna hi party inbeihna leh hamthat lak tumna satliah mai a ni lo tih sawrkar hian hria sela, Mamit District mipui harsatna tawh mek sukiang tura theih tawp chhuaha tan  a lak a ngai.Hetiang khawpa harsatna tawka mipui an mangan lai pawha an ngawi tlat a, hmalakna mumal sawi tur an nei lo a nih chuan, kalphung thara beiseina sang tak nei mipui rilru a hnual chho zel dawn tih an hriat pawh a tul.

Ram pum huapa ZPM thli a tleh vanglai leh an laka beiseina thar neia ngaihtuahna fim taka hmangtu Mamit District chhunga mizo mipui tam tak hian an lakah beisei tur an hmu lo a nih chuan hun lo la awm tur atan chet lak a harsa zual duh mai thei e. Khawthlang mipui hian thil tha duhna an nei a, thil an thlir thiam tawh a, thu mai ni lo, a taka hmasawnna dik tak hmuh ve hi an duh tawh a, chu chu an beisei a ni.