Mamit District kawng chu lirthei tlan hleih theih loh khawpa a chhiat avangin siamthat a nih hma chu nimin atang khan Buhfai phur lirthei lian a tlan tawh rih lo.
Mizoram Truck Driver’s Association chuan thuchhuah siamin, khawthlang lam kawng chu hun rei tak atanga chhia a ni a, mipui mamawhna avangin an tlan hram hram thin laiin tun dinhmunah tlan hleih theih loh khawpin a chhe zual a, motor a chhiat phah nasat bakah nunna atan pawh a hlauhawm tak avangin kawng chu tlan ngamna khawpa siamthat a nih hma chuan Buhfai phur truck te chu nimin October ni 2 atangin an tlan tawh dawn lo tih an sawi.
Hemi chungchangah hian MTDA President Pu H Laldingliana chuan hun rei tawh tak atang khan kawng khuar nasa leh chhe lutuk avangin tlu lek lekin an tlan fo a ti a, buhfai an phur thin zatve vel tunhnaia an phur chung pawn kawng khuarah an la tang thova, an lirthei in a tawrh bakah nunna atan a hlauhawm avangin buhfai phur driver te zingah tlan ngam an awm tawh lova, MTDA committee chuan thuneituten kawng khuar zualpui an hnawh sak hma chu tlan tawh loh an rel a ti a. Tun dinhmunah Mamit District kawngchhia avang hian buhfai phur truck 6 chu tlan ngam lovin an ding mek tih a sawi bawk.
0 Comments