Mamit leh Bairabi inkar kawngpui, National Highway No 6 (Spur) a puan tawh chu tun dinhmunah a chhe hle a, lirthei chi hrang hrang tan kal a harsa hle.
Mamit leh Bairabi inkar kawngpui chhia avang hian lirthei chi hrang hrang veivak thin ten harsatna an tawk a, mipui mamawh lakluh kawngah harsatna a thleng bawk. Tun dinhmunah he kawngpuiah hian tuialhthei phur an kal ngam rih lo a, hemi avang hian Mamit khawpuia Filling station awm chhun C.L. Filling stationah tuialhthei duh ang anga lei tur a awm rih lo.
C.L. Filling Stationa thawktute hnen atanga Mamit Times thudawn danin tuialhthei phur motor hi a kal theih hun tur sawi theih a la ni lo a, C.L. Filling stationah tuialh thei a thlen hun tur an sawi thei rih lo a ni.
Mamit leh Bairabi inkar kawngpui chhe lutuk chungchanga Mamit Times zawhna chhangin Pu PC David Lalrinliana, EE MPWD NH Division I chuan ruahtui tla avangin duh ang leh beisei anga hnathawh a chak theih loh thu a sawi a, hna erawh chawlloa thawh reng a nih thu a sawi.
He kawngpui thawm thatna tur hian STMC hmanga thawh turin Ministry lam atanga sum hmuh a nih leh tawh thu leh Tender koh tawh a nih thu a sawi a, STMC hi kum khat chhung atana tih a nih vangin tun tumah hian Calendar year anga kalpui a ngaih a rin thu a sawi bawk.
Bairabi leh Mamit inkar kawngpui thawm that hna thawh mekah Bairabi lam atanga thawktu MPWD NH Division III lam pawhin hna hi an thawk chhunzawm zel tih an sawi a, tun dinhmunah Damdiai atanga Mamit lam kilometer khat leh a chanve vel thleng an khawih tawh thu leh ruahtui tam vanga hna a sawt loh thu Pu Joseph Laldintluanga SDO, NH Division III chuan Mamit Times a hrilh.
0 Comments