Nov ni 11-a Dampa Assembly bial Bye-Election neih tur atan Political Party hrang hrang ten ngawrh takin campaign an kalpui a, Inthlan kaihhruaina dan leh hrai bawhchhiaa inpuhna vanga lungawilohna theh luh a awm tawh.
Dampa Bial bye-Election lo awm tur atana inbuatsaihna kal mekah Political party hrang hrang ten ngawrh takin campaign an kalpui a, inthlan campaign neih mekah Inthlan kaihhruaina, dan leh hrai bawhchhiatna awm nia hriat vanga Inthlan thuneitute hnena lungawilohna thlen pakhat awm tawhin Chief Minister Pu Lalduhoma leh Pu Dr. Lorrain Lalpekliana Chinzahte chu Inthlan kaihhruaina dan bawhchhiaa hmalakna kalpuiah puh an ni.
Hemi chungchanga Complaint thehluttu, Zothansangi Hmar, Advocate College Veng, Aizawlin Joint Chief Electoral Officer, Mizoram hnenah Ni 24/10/2025 khan ziaka lungawilohna thlenin Pu Lalduhoma, Chief Minister chu ruahmanna thar hmanga hmalakna tur puan vanga Inthlan kaihhruaina (MCC) bawhchhiaah a puh a, Dr. Lorrain Lalpekliana Chinzah MLA, Adviser to CM chu a thlawna inentirna buatsaih leh a thlawna mipui hnena damdawi a sem vanga inthlan kaihhruaina (MCC) bawhchhia-ah a puh bawk.
Heng, Inthlan kaihhruaina, dan leh hrai, tihtur leh tihloh tur hrang hrang bawhchhiaa puhna awm hi Inthlan thuneitu lam chuan chak takin an bawkzui mek.
Dampa bial Inthlan, Ni 11/11/2025 a neih tura Political Party hrang hrangte campaign neih mek chu inthlan leh a kaihhnawih hmalakna viltu hrang hrang ten ngawrh takin an vil reng a, danin tihtur a tih leh tih lohtur a tihte tha taka zawm vek turin Political Party hrang hrangte an ngen a a ni.
0 Comments