Dampa biala by-election chuh tura hming pek luh ni hnuhnung vawiin khan PC Party Vice President Pu K. Zahmingthanga, Sakawrtuichhun, Aizawl chuan nomination a thehlut a, heti hian he bial chuh tur hian candidate 5 an awm dawn a. Hming pek luhte hi naktukah endik a ni anga, candidate-te inhnuhdawh theih hun hnuhnung atan tun thla ni 24 ruat a ni. Dampa Bial Assembly By-election neih tura chuh tumte tana hming pek luh hun hi nimin chawhnu dar 3 khan khar a ni.
PC Party Candidate Pu K. Zahmingthanga chuan, kan corr zawhna chhangin tlin inbeisei lutuk lova ding anih thu a sawi a, Zoram mipui ten kawng diklo an zawh nasa tawh em em a, mi pahnih khat talin an lo harhchhuah theih phah nan a ding niin a sawi.
Dampa Bial Assembly By-election hi kil 5 atanga chuh a ni dawn a, BJP Party chuan kum 2023 a he lai biala Congress candidate, tunhnai a an party zawmtu Pu Lalhmingthanga chu an vawrh chhuak a, Congress in Minister hlui Pu John Rotluangliana an candidate a. MNF chuan an Party senior Vice President leh Minister hlui Dr. R. Lalthangliana din tirin ZPM atangin kum 2023 inthlana tling zo tawh lo Pu Vanlalsailova an din nawn tir leh bawk.
Dampa assembly bial bye-election a tul chhan chu July ni 21-a helai bialtu MLA Pu Lalrintluanga Sailo MNF a thih vang a ni a. Bye-election atan hian November ni 11 khian vote thlak a ni ang a, November ni 14-ah vote chhiar a ni ang.
Dampa Bialah hian vote thlakna hmun (polling station) 1,276 a awm a, Dampa Bial chhungmi vote nei mipa 10,605 leh hmeichhia 10,185 bakah, service voter mipa 111 leh hmeichhia 4 an awm a; vote nei zawng zawng hi an vaiin mi 20,905 niin, mipa 10,716 leh hmeichhia 10,189 an ni.
0 Comments