Mamit leh Bairabi inkar kawngpui a chhe em em reng a, hnathawh chhun zawm reng nia sawi a nih laiin harsatnain ziaawm lam a pan thei meuh rih lo a ni. Tun dinhmuna kan nghah ber nia lang chu thal khaw ro hun, ruahtui tlak loh hun ni berin a lang ta a, a manganthlak a ni.
Fur ruahtui tlak laia kawngpui siam hi thil awlsam a ni hauh lo ang tih a chiang a, chutihrual chuan, hman atanga vawiin thlenga kan chhuanlam/harsatna a pangngai a ni reng hi chu inenfiah deuh a, a sukiang tura tan lak ve deuh chu a ngai niin a lang.
A nihna takah chuan he kawngpui hi kum kalta maiah Short Term Maintainance Contract (STMC) hmanga thawm that a ni a, fur lo thleng a dawl zo lo a ni ber. Chumi hnuah Minister hoa a hmuna kal ten ngaihtuahna hmangin cheng nuai 65 an ruahman a, chu sum hmang chuan hnathawh mek a ni a, harsatnain ziaawm lam a pan chuang lo. A eng ber hi nge kan mutan ? Social media lamah rin thu kan insawi siak a, harsatna kan sawi luai luai a, mipui rilruah rinhlelhna a pian phah lo chauh tawh a nih hi. Hetiang taka harsatna kan tawh lai hian sawrkar thuneitu lam an ngawi thei phian a, a bawh chak tur rorellai party in sawitur mumal an hre lo a, tih theih nei lo zawk eptu party lamin an tlawh/en a, chak zawka hmalakna kalpui thei tur leh harsatna tlem tal sukiang thei tur khawpa hmalak chhunzawm hriat tur erawh a awm chuang lo. A tawpah Tlawmngai pawl bawk kan kawk leh mai dawn a nih hmel e.
Minister meuhin kan kawng chhia min hmuhpui leh min zawhpui kha “a lawmawm” tiin hahipin kan sawi a, kha ringawt kha kan kawngpui hian a that phah lo tih vawiinah hian a lang chiang a ni. Sawrkar sum dinhmun chhe tak karah a thawmna tur sum ruahman a ni kha a lawmawm em em. Sum awm ang ang hmanga kawng chhe zual a taka thawm that a nih theihna tura ngaihven leh mawhphurhna neitute nawr/tur ve pawh hi sawrkar lama thuneitute mawh a ni ang.
Beiseina nena kan inthlir tir mek National highway No 6 (Spur) hi chuti maia hnathawh tan theih a ni lo ang tih ring ila. Chuta tang chuan kan vawiin dinhmun pawimawh zia kan hrethiam thei awm e.
He kawngpui chhe lutuk thawm thatna tur hian tunah STMC hmang bawka thawh turin sum pek chhuah (sanction) leh tawh niin hnathawktu tur kohna (tender) tih chhuah a ni leh tawh a, hei pawh hi thil lawmawm tak a ni. Ruahmanna leh rawtna siamtute an fakawm tak zet e. Ruahtui a hul dawn a, hnathawhna hun tha nia an sawi thin a intan chho dawn. A hunlai nia an sawi chhung ngeia chak zawka hnathawh a nih theihna tura nawr ngai leh bawhzui ngai awm ang ang chak taka umzui hi sawrkar thuneitute leh mawhphurhna neitute koah a innghat ta a ni. Tan lak a ngai, a hun loa sum leh tha tam tak senral vanga kawngpui tha hmuh tur awm chuang lo mangangthlak zia kan hriat mek hi.
Vawiin atanga ngun taka ngaihtuah tur kan nei bawk. NH 6 (Spur) kal turah Forest Clearance buaipui chhoh mek a ni. Hmasawnna tikhaihlak thei thil lakah fimkhur leh inven a tul hle. Pawisak loh chin neih ringawt pawi si zia kan hriat tawh kha.
0 Comments