“Mizote hi kan tlema, pian pun a ngai, chu chu hnam anga kan himna tur a ni” kan ti fo a, a dik. Chutihlai chuan “fa neih tlem changkanna” tih thupui, kan rilrem zawng taka zirtirna kan dawn thin khan min la hmin deuh vek thung a, nupa kara fa nei tam ngam an tlem em em a (hriselna dinhmun chu thudang nise), fa nei tam thei tur khawpin kan hriselna in a tlin lo a ni deuh ber tawh a, nupa kara nau piang an tlem a, piang tawh zingah thalai an thi zawih zawih thung.
Nupui/Pasal nei lo nula tlangval an zi hut hut a, thian inkawmngeih inhlawmkhawm an tam tuh tulh a, nupaa insiam tum an tlem zel a, chhungkua leh Kohhran ang pawh buaipui tham a tling ta. Hei hian chhan tam tak a nei ang.
Kan thalaite an fing tawh a, an hawiher a zau a, nupui/pasal neih vanga harsatna awm thei tam tak an thlir thiam tawh a, khawsak dinhmun nawm loh hlauhna rauin nghet takin a man a, tehna chi hrang hrang an hmanga, kan State leh mipui nawlpui eibar leh sum pai dinhmunin a la zir chiah si lo a, kut hnathawka thlan tlaa rim taka nupui fanau/pasal fanau chawm turin tumruhna leh taimakna in a tlin tawh si lo. Kan nihna ang lo deuh hlekin kan nung a, kan khawsak dan, nitin mamawh leh senso a sang a, kan nihna dik tak anga nupui/pasal nei tur khawpin huaisenna kan nei leh bawk si lo. Heng hian nupui/pasal neia nupaa insiama pian pun kawnga hmasawn turin min dal ve bawk a ni.
A hun laia duhthusam hmu zo lo kan nula te, fa nei thei tura an chhul a chak that tawh loh hnuah, tihluihna leh loh theih lohna avangte in pasal an nei a, fa neih kawngah harsatna an tawk a, harsa tak chungin pahnih khat emaw lek fa an nei thei hram a, a buaithlak a ni. Tlangvalte nise, hmeichhia in innghahna tlaka an ngaih an tam ta lo niin a lang bawk. Nupui tlak/Pasal tlak ni tura thalaite an inbuatsaih a tul.
Pathianin mihringah hmangaihna thuk tak a dah a, chumi hmanga mipa leh hmeichhia pumkhata insiama chhungkaw din hi Pathian remruat a ni. Ngaihzawng neih duah a, neih hnuhnun apiang hmangaih ber zel chunga nupui/pasal neih tum chuan si loh hi Pathianin mihring khawsak dan tura a ruahman a ni lo tih hriat a tul.
Thalaite harh thar ila, hausakna leh rosum aia hmangaihna dah pawimawh ber chungin, hmangaihna chuan engkim a tithei tih vawng tlat chunga nupui/pasal nei ngam tur khawpa huaisenna nei tura inbuatsaih a tul a ni.Mizote hnam anga kan pun leh pun loh hi vawiina nula tlangval, thalai, nupui pasal la nei loteah hian thui tak a innghat a, tlem avanga chim ral mai hlauhawm kan nihna sawi fo thin kan thalaite hian punna tura tan an lak a ngai tih an hriat tel a tul a, mipa an ni emaw, hmeichhia pawh nise, hahdamna ringawt thlir loa, taima taka eng hna pawh thawh hreh nei loten ei an hmu zel tih hriatreng a pawimawh.
Hetiang a nih lai hian, chhungkaw keh chhe leh tur dina enkawltu mumal neilo fa hring teuh tura nupaa insiam ngawt erawh kan thatpui lo tih kan hriat tel a tha awm e.
0 Comments