National Highway 44A/108 Mamit leh Dapchhuah inkarah leimin vangin a ping fo a, hei hian khualzin leh lirthei tan harsatna a thlen nasa hle a ni.
Kawng ping vanga mipui harsatna thleng fo tihziaawm a nih theihna turin MPWD NH Division I chuan Mualpui peng leh Dampui inkar kawng hlui chu lirthei kal theih tura tihfai hna an thawk a ni.
Hetiang a nih lai hian, Dampui leh Dapchhuah inkar pawh lirthei kal theih tura siam tul nia hriatna avangin Dampui Khawtlang hruaitute chuan ngaihtuahna an seng a, Dapchhuah thlenga kal tlang theih lohna lai, Dampui leh Supana Quary inkar (6km) chu lirthei kal theihin nizan khan an siam tlang.
Hemi chungchanga Mamit Times zawhna chhangin Dampui VCP (Chairman VEC ni bawk) Pu Lallawma chuan helai kawng lirthei kal theiha siam hi Dampui khaw tan chauh ni lo, mipui zin veivak tana tul leh mamawh nia an hriat vangin MGNREGS hnuaia mipui pawisa thawh khawm hmangin an siam tih a sawi. Lirthei kal theih tura helai kawng siam nan hian mihring tha bakah Khawl (JCB) ruaiin cheng sing hnih tling lo deuhin a tul zual an thawk zo thei tih a sawi.
Supana Quarry atanga Dapchhuah (6km) chu quary neitu hian a sial tlang tawh a, Dapchhuah thlen hma, Ngiau hmun (Forest Plantation) tun hnaia kawng min lai chu a diak deuh tih lohah chuan Dampui leh Dapchhuah inkar chu lirthei te (LMV) tan kaltlang theih vek tawh tura an ngaih thu Pu Lawma chuan a sawi.
0 Comments