Mizoram pumah inkalpawhna kawngpui a chhe tlangpuia, sawrkarin a ngaihsak tawk loh vang niah kan ngai a, uar takin kan sawi a, a dik ang. Sawrkar tha tichak tur leh ram tana tha thawh ve tura pen chhuak an awmin kan sela, party inbeihnan kan hmang leh hlauh thunga, kan kawngpui chhia ai mahin, midang tihchhiat kan tumna leh chan tha chan tuma kan beihna rilru ber hi siamthat a ngai a ni.
Mamit District chhunga inkalpawhna kawngpui chhia avangin kan mangang a, thuneitu ten theih tawp chhuah nia an insawi chung pawhin an aia thuneitu lam chet a muan chuan tihngaihna a awm lo. Pawl hrang hrang ten tlawmngaih chhuahin theih ang angin an thawm a, heng hi a hlu.
A bik takin Mamit leh Dapchhuah inkar kawng ping vanga harsatna thleng thin tih ziaawm a nih theihna tura kawng hlui tihfai leh thawm that hi a va hlu em. MPWD NH Division I ten sum hmuhna tur hre mumal lo chunga huaisen taka hmalakna an kalpui ngam hi an fakawm.
Heng zawng zawng aia ropui zawk leh rilru khawih zawk chu Dampui khawtlang hruaitute hmalakna leh hnathawh hi a ni. An khaw bilin an chhawr tur a nih leh nih loh lam aia ram leh district mipui nawlpui mamawh leh chhawr tangkai tur a nih vanga mipui pawisa thawhkhawm hmanga sawrkar kawng lirthei kal theih tura an siam thei hi a va hlu em. Fak an phu a, entawn tlak an ni. Sawrkar nawr chiam chiam lo leh sawrkar kut nghaka awm mai loa, anmahni leh midang tana tangkai tur, mite tana malsawmna ni tura hnathawh duhna rilru thianghlim an pu leh tumruhna an nei hi an chhuanawm tak zet a ni. Dampui khawtlang chunga lawmthu sawi hi sawrkar pawhin a tih ngei tur a ni ang.
“Khawtlang leh mimal, khua-leh-tui kan nih anga ram tana tha thawh hi kan tihtur a ni” tia kan inzirtir lai hian, sawrkar hi tlawmngai pawl leh mimal tha thawh nghaka awm tur a ni lo tih hriat a tha. Sawrkar a chet theih baka puitu nih hi tuman an hreh lo. Puih tlak ni tura hmahruaitu an nih erawh a ngai thung. Sawrkar chetna tur thila khawtlang emaw, pawl emaw an chet chhuah a ngaih fo chuan sawrkar chak tak a ni lo tih a lang chiang thin.
Vawiina kan hmuh leh hriat hian piantharna min neihtir sela, khua-leh-tui ten ram leh khawtlang tana tih ve kan neih hi kan mawhphurhna a nihzia min hriat chian tir sela, mipui leh tlawmngai pawl te chet chhuah ngai loa ram leh mipui mamawh ngaihtuah, chak taka hnathawh, harsatna sut kian hi sawrkar mawh a ni tih hriat chian lehzual nan, inhmuhchhuah nan hmang ang u.
0 Comments