Mamit leh Aizawl inkalpawhna kawngpui, National Highway 44A/108 Mamit atanga Dampui Bazar thlen hmaa ping chu nimin chawhnu lam khan lirthei eng chi pawh kal theih tura siam tlang a ni.
Tun hnaia ruah sur nasa avangin National Highway 44A/108 pawh leimin avangin hmun tam takah a ping a, kawng enkawltu lam ten ngawrh taka hna thawkin kawng ping vanga khualzin leh lirthei tana harsatna lian tham tun dinhmunah a awm rih lo nia hriat a ni.
Hetianga Mamit leh Aizawl inkalpawhna kawngpui ber a pin fo avang hian kawng hlui, Mualpui peng to Dampui via Zongaw pawh lirthei te (LMV) tana kal theih tura siam mek a ni a, kawng hnim lutuk samfai hna thawh niin hei hi vawiin lamah chuan zawhfel hman beisei a nih thu MPWD NH Division I enkawltute hnen atanga Mamit Times thudawnna chuan a sawi.
Mamit Times zawhna chhangin Pu PC David Lalrinliana Sr. EE NH Division I chuan kawng hlui lam kal theih tura hnathawhna hi pawisa awm sa a nih loh thu leh Mamit District Bawrhsap te nena ruahmanna siama hnathawh a nih thu a sawi a, mipui mamawhna a san avanga hmanhmawh taka hnathawh a ni a, pawisa hi khawi atanga hmuh tur nge a nih sawi mai theih a la nih loh thu a sawi.
National Highway 44A/108 kawng hlui thawm thatna tur (One Time Improvement) thawhna tura sum ruahman cheng vaivelchhe 51 chuan technical thila paltlang ngai a paltlang vek tawh a, MoRTH New Dehli lamah a la tanga, sanctioned hmuh hun tur hriat a lam nih loh thu Pu Davida chuan a sawi a, Minister leh Secretary ten an umzui reng tih a sawi bawk.
0 Comments