National Highway No 6 (Spur) Bairabi - Mamit kawng chhia a vanga harsatna chuan ziaawm lam a la pan thei meuh lo a, hna erawh thawh chhunzawm reng a ni.
He kawng chhe lutuk thawm thatna tur hian tun hnai mai khan sawrkarin sum a ruahman a, Bairabi atanga Damdiai thleng enkawltu Mizoram PWD National Highway Division-III ten he kawnga an mawhphurhna chhina hna an thawhna tur hian cheng nuai sawmthum ruahman a ni a, Damdiai - Mamit enkawltu NH Division-I hman turin cheng nuai sawmthum panga ruahman a ni bawk.
MPWD NH Division-III hian tunah hian chak takin hna an thawk mek a, Division-I lamah erawh hmalakna lian tham sawi tur a la awm thei rih lo.
Hemi chungchanga Mamit Times zawhna chhangin Sr. EE MPWD NH Division-I Pu PC David Lalrinliana chuan lung (Boulder) hman tur mamawh ang an hmuh theih loh vanga hna la tan ve tak tak thei lo an nih thu a sawi.
Pu Davida chuan, tun dinhmunah pawisa ruahman hi a taka hman nghal theih tura hmuh a la ni loa, mipui leh hnathawktute mamawhna hriaa sum hmu nghal lo pawha lung lak tur awm se chuan hna hi tan ve thei reng an nih thu a sawi.
Division-III te nen hian inbe pawp renga ruahmanna siam an nih thu sawiin Pu Davida chuan Division-III lam ten an chan lam hi chak taka an thawh a, Bairabi lam atanga hmanraw phur a kal tlang theih hunah NIDHI Creative Infastructure Pvt, Ltd te hmanrua hmang tura ruahmanna siam a nih thu a sawi a, hei hi company liante hnenah sum fai pe nghal lo leh inthlahrung lutuk loa mamawh lak theih beisei vang a ni tih a sawi.
Hei bakah hian Damdiai khaw bula lung lakna (Quarry) neituten lung an lak theihna turin an hmanraw mamawh ang pawh ngaihtuah sak (hawh sak) an nih tawh thu a sawi bawk.
Pu Lalnunhlua SDO NH Division-I pawhin lung lakna (quarry) neite hnen atanga lung lo hman theih/lak theih a awm chuan Mamit lam atang pawha hna hi tan mai theih a nih thu a sawi a, kawng khuar lai hnawh satliah ngawt loa, kawng chhuat (lei nghet) chin hai fai hnuah tha taka hnathawh tum a nih thu a sawi a ni.
0 Comments