Er. Jacob Lalrinfela, EE P&E Mamit Division chu EE (Commercial) E-in-C a awm turin sawn a ni a, EE P&E Mamit Division mawhphurhna chelh turin Er. Lalnghakliani EE (Planning) chu ruat a ni.
Mizoram sawrkar Power & Electricity Department Secretary in Ni 12/8/2025 a lehkha No A. 22012/5/2007 - P&E hmanga hriattirna a tihchhuahah P&E hnuaia Engineer pathum awmna a siksawi a, heng zingah hian Mamit Power Division enkawl mektu Er. Jacob Lalrinfela EE pawh a tel a ni.
Hetianga MES siksawi a niha Mamit Power Division enkawl mektu EE sawn chhuah tum a nih thu hriat a nih veleh rorellai party (ZPM) Mamita hruaitute chuan Chief Minister Pu Lalduhoma leh P&E changtu Minister Pu F. Rodingliana chu nimin Ni 13/8/2025 khan an hmu nghal a, EE P&E Mamit Division Pu Jacob Lalrinfela chu sawn chhuak rih lo turin an ngen.
ZPM hruaitute hian tawngkaa ngenna an thlen bakah ziakin an thlen bawk a, an lehkhaah chuan “ Tun dinhmunah hian Mamit P&E hian project pawimawh tak tak a khawih mek a, heng project te hi tha tak leh rang taka siam zawh a nih theih nan Pu Jacob lalrinfela, mi thiam tak hi Mamitah a la awm a ngaiin keini party pawhin kan hria a ni” tiin an ziak.
132kv line Bairabi - W. Phaileng via Mamit chinfel ngai tam tak la awm leh la commission lohte, NH No 6 kal tur vanga tower tihdanglam ngai tur engemaw zat awm avangte leh P&E Mamit Division in EE chak tak a mamawh avanga he order ho sut leh turin an ngen a ni.
Mamit khawtlang leh District tana thahnemngai taka ZPM party hruaitu ten sawrkar thuneitute an ngenna ah hian thu lawmawm leh an duhna tihlawhtling zawnga hmalak tumna a awm lemlo nia hriat a ni.
0 Comments