Mamit District thuthmuna tuialhthei lakna awm chhun C.L. Filling Station thuneitute chuan tuialhthei nghei mai thei dinhmuna an din mek thu an sawi.
C.L. Filling Station Mamit thuneitute chuan tuialhthei an lakluhna Mamit leh Bairabi inkar kawng chu hmun hnih, hmun thum velah tuialhthei phur lirtei tana kal harsa khawpa a chhiat avang leh an kal pawha an tan ziah avangte, tuialhthei phur motor tang lak chhuahna senso a san avanga an chawi belh thin avangin tuialhthei phur motor hi an kaltir reng thei lo ang tih a hlauhthawnawm thu Mamit Times an hrilh.
C.L. Filling station neitu Pu C. Lalsangliana chuan he an harsatna tawh mek hi District thuneitute hnenah an thlen tawh tih a sawi a, Bairabi - Mamit hi tuialhthei an lakna kawng atana IOC in a pawm a nih avangin an tan kawng danga kal ve ngawt a remchang lo/him lo tih sawiin, kawng danga kal mai phalsak tura dilna pawh thuneitu lamah an thawn tawh thu leh chhanna an la hmuh loh thu a sawi.
Kawng chhiat avanga tuialhthei phur a kal theih loh chuan filling station bawk hi mipui dem hlawh tur an nih avangin theih ang anga kawng siamthat dan ngaihtuah tura thuneitute an beisei thu a sawi bawk.
Hetihlai hian, Mamit leh Bairabi inkar kawng chhe zual lai hnawh tur hian a hnawhna tur ber lung an hmuh that theih loh thu SDO Highway Division I chuan a sawi a, lung hi an zawn reng thu sawiin tunkar hian Rawpuichhip lam atanga hmuh theih an beisei thu a sawi bawk.
Mamit Times zawhna chhangin SDO Highway Division I chuan helai kawng siam hna thawhna tur sum an hmuh that thu leh sum hnuhnung ber lo kal tur chiah a awm tawh thu a sawi a, he hna hi company hminga chhan a nih vangte, Highway Division-III nena hna insem an nih avangte in pawisa hi semsawm a nih thu a sawi.
Tun dinhmunah C.L Filling Stationah hian Petrol litrs 9500, Diesel Ltrs 7000 vel a awm a, lak theih zat bithliah awm rih loin bura lak phal a ni lo.
0 Comments