Mizoram chhunga MGNREGS kalpui mek danah, sum hmuh leh hnatawh a inmil lo lutuk vangte, a taka hnathawh hmuh tur awm lo lutuk vangin Ministry of Rural Development, Govt. of India a lungawi lo hle a, MGNREGS kalpui dan tihdanglam tum a ni.
Hemi chungchanga Mamit Times zawhna chhangin Pu Lalawmpuia, Addl. Programme Officer, MGNREGS Zawlnuam II chuan tun hnaiah MoRD atanga Mizorama MGNREGS endiktu lo kal ten District thenkhat an tlawhna ah sum hmuh leh hnathawh inmil lo lutuk vanga an lungawi loh thu leh hemi kal zel ah hian MGNREGS kalpui dan chu tih danglam ngai ta niin a sawi a, khawng taka kalpui a ngaih tur thu a sawi bawk.
Mipui pawisa thawhkawm hmanga hnathawh kalpui rih a nih dawn pawhin khauh zawka inhruai a ngai tawh dawn tih sawii, mipui pawisa thawhkhawm leh a hmanna pawh department lamin audit mai a tul tawh dawn nia a hriat thu a sawi a, kaihhruaina thar anga fel tak leh hmuh thama hna kalpui a nih loh chuan mipuiin a tak taka hnathawh a ngaih tur thu leh Ministry pawhin MGNREGS hi min suih zuih sak hreh dawn lo nia a hriat thu a sawi.
Addl. Programme Officer chuan MGNREGS hnathawhna tur mipui pawisa thawhkhawm, VC leh mi hrang hrangin an pawt peng nasa lutuk nia an hriat thu sawiin hei hi tihtawp a tul thu a sawi bawk.
Hetiang a nih mek lai hian, kar tharah hian Zawlnuam, W. Phaileng leh Kawrtethawveng RD Block huam chhunga MGNREGS hmanga hnathawh hrang hrang endik turin Nationa Level Monitoring Team an lo kal dawn a, an tlawh tur tak tih chian la ni lo mahse Mamit khawpui chhung VEC then khat hnathawh pawh an en ngei rin a nih thu Addl.Programme Officer, MGNREGS Zawlnuam II chuan a sawi.
0 Comments