KAL THUAHNA KHAWL MAMIT DISTRICT HOSPITAL BUILDING THARAH BUN TUM A NI

 Kal thuahna khawl pahnih, Mamit District Hospital atanga Champhaia dah tura tih chu vawiin hian Mamit District Hospital building tharah bun tum a ni.

Mamit District Hospitala dah tura tih, kal thuahna khawl chu a bunna hmun tur a awm lo nia ngaih vangin Serchhip District Hospital leh Champhai District Hospitalah dah lailawk tura tih a ni a, heng zinga pahnih hi Serchhip District Hospitala dah turin phurh chhuah a lo ni tawh.

A dang pahnih la awm pawh Champhai District Hospitala dah tura tih a ni a, Mamit khawpui chhunga pawl hrang hrang, khawtlang hruaitu leh Political Party chuan hei hi remti loin nimin lam atang khan a dahna hmunah an lo veng tawh a, thuchhuah nen an umzui bawk.

Hetiang a nih lai hian Mamit bialtu MLA Pu H. Lalzirliana pawhin theih tawp chhuahin hma a la a, hetiang khawl Siaha District Hospitala buntu (Engineer) chu vawiin hian Mamitah rawn hruai thlain kan khawl la kawlte hi District Hospital building tharah bun tum a ni ta a ni.

Hemi chungchang Mamit Times zawhna chhangin bialtu MLA Pu H. Lalzirliana chuan vawiin chhun dar 11 velah Mamit an rawn thlen theih a beisei thu a sawi a, District Hospital thuneitute, All NGOs leh khawtlang hruaitute nen a dahna tur hmun enhoin, tha nia hriatna hmuna dah mai theih a beisei thu a sawi.

Mamit Times zawhna chhangin Dr. Lily Chhakchhuak, Mission Director NHM Mizoram chuan heng khawl hi a petu IOC ten bun fel thuai kha an duh ber a ni a, Mamit District Hospital building thara bun theih a nih chuan a tha lam niin a lawmawm hle tih a sawi a, sawrkar atanga harsatna a awm a rin loh thu a sawi. Khawl pahnih, Serchhip District Hospitala dah tura phurh chhuah tawh lak let  theih a nih leh nih loh chungchang zawhna chhangin Dr. Lily chuan sawrkarin ruahmanna a la siam leh mai tura a ngaih thuin a chhang bawk.