Mamit District chhunga kawngpui pawimawh, inkalpawhna atana kan neih chun tak meuh meuhte chu “Mizoram chhunga kawng chher ber” tia chhal sak kan ni a, hei hi zah tur nge, lawm tur nge ni ang tih erawh hriatthiam a har hle a, kan nihna dik tak hmuhpui, tarlan leh sawi chhuah a ni hian rah tha a chhuah erawh beisei phawt ang.
Kawngpui chhia avanga mipuiin harsatna an tawh dan chiang zawka hre zawk tura a changtu Ministerin a hmun ngeia a tlawh leh kawng chhiaa lirthei tlan a hlauhawm zia leh a hrehawm zia a taka a hre ve duh kher hi a hlu hle a, Mizoram chhunga kawngpui chhe ber a nih mek thu sawi ringawtah hian tawp lo sela, thawm tha tura rang taka ngaihtuahna sen leh a taka kalpui a tulna hian an ngaihtuahna luah hneh zawk sela a va duhawm tehlul em.
Nitin mamawh lakluhna ringawt ni lo, damlohna thil avanga mipuiin harsatna an tawh nasatzia thlengin hrethiam phak sela, hetiang ang kawng hi nitina an zawh leh eibar lakluhna thlenga an rinrawl ber ni ve se, eng ang rilru nge an put ang a, eng ang taka hmalak nge tul nia an hriat tih thlengin ngaihtuah sela, an nitin khawsak dan leh an enkawl mipui dinhmun inthlauhzia hi hmu thiam mawlh rawh se. Chu chuan thil tak tak tih duhna leh thil tha leh rotling hnutchhiah duhna leh pawimawhzia a pe hlauh mahna.
Kan vawiin dinhmun hetiang hi a ni a, thawk leh khata siamthat thut harsa a ni ang tih chu mi pangngai chuan an hre thiam pha vekin a rinawm. Kan hma hunah, hna lian leh pawimawh, mipui tana tha tur, mipui chhawr theih tur thawk turin ruahmanna kalpui mek a ni. Vawiina kan dinhmun ang leka indintir tawh lo tura dik tak, fel tak leh khawng zawka kaihhruaina leh inenkawlna kan mamawhzia hi kan dinhmun chiang taka rawn hmutute hian hmu tel hlauh se a va hlawk dawn em.
Fello leh thalo awm thei veng tura mawhphurtu leh thuneihna neitu chu vawiina thil tihtheihna neia awm mekte hi an ni tih hrereng sela, Lalna leh thuneihna in a ken tel mawhphurhna la ngam lo leh hlen chhuak thei lo khawpa dawihzep, mahni hlawhfa chhawrte pawh thunun thei lo khawpa huaisen ngam lohna thlarau sualin a man avanga thil tha aia thil tha lo thlen tam thin zia hi hmu thiam sela,vawiina kan dinhmun mek min hmuhpui hi ram pum enkawlna ah piantharna tura thil pawimawh a nihzia an hriat thiama, nasa zawka tanlak nan an hman duhawm tak zet a ni.
0 Comments