Inrinni zana ruah nasa taka sur avang khan Mamit District chhungah inkalpawhna kawngpui hmun tam takah a ping a, kawng ping thenfai leh siamthat hna ngawrh taka thawh mek a ni.
He thu buatsaih lai (tukin zing) thlenga kan kawng dinhmun tlangpui Mamit Times zawhna chhangin SDO MPWD NH Division I chuan National Highway 44A/108 Dapchhuah leh Rawpuichhip inkara leimin vanga ping chi nizan khan thenfai a nih hnuah tukin zing lamah leimin bawkin kawng a hnawh leh tih a sawi a, Dapchhuah leh Mamit inkar, Dapchhuah lui bul lawka kawng bal/min erawh chuti maia siam tlang theih anih loh thu a sawi.
Darlak leh Tuidam inkara leiminin hmun engemawzata kawng a hnawh pin chu thenfai a ni tawh a, lirthei tang/tangkhang erawh a awm nual niin SDO chuan a sawi.
Mamit leh Bairabi inkar kawng NH No 6 lamah erawh leimin vanga kawng ping a awm lo nia an hriat thu SDO NH Division I chuan Mamit Times a hrilh.
DDMA lamin a tarlan danin Nalzawl khuaa oil palm chingtute oil palm engemawzat luite lianin a tichhia a, tun dinhmunah Nalzawl khaw panna kawng a ping rih.
Mamit District chhunga chhiatna thleng mek chungchang sawiho tur hian District Bawrhsap, Chairman DDMA ni bawk chuan vawiin chawhnu dar 2 hian DCs Conference Hallah thutkhawm hmanhmawh a ko.
0 Comments