Ni 21/7/2025 Thawhtanni atanga Mamit leh Dapchhuah inkar kawngpui leimin vanga ping chu nimin tlai tawh takah khan thenfai zawh a ni a, lirthei eng chi pawh kal theih tura sial tlang a nih hnuin tukin zing atang khan kawng hi a ping leh rih a ni.
Ni 20/7/2025 Pathianni zana ruah nasa tak sur avang khan Mamit leh Aizawl inkalpawhna kawngpui NH 44A/108 chu Mamit atanga Dapchhuah thlen hma hmun tam takah leimin vangin a ping a, hei hian nasa takin nunphung a tikhaihlak.
Sawrkar hnathawk Mamita awm (Officer leh Officer lo pawh) kar tawpa Aizawl lama haw engemaw zat he kawng ping avang hian Aizawl lamah an tangkhanga, nimin Ni 23/7/2025 thleng khan mahni thawhna hmuna pisa kai thei lo sawrkar hnathawk engemaw zat an awm.
Mamit leh Aizawl inkalpawhna kawngpui ping avang hian mipui nitin mamawh lakluh kawngah khaihlak chin awm bawk mahsela, sumdawng leh mipui tana harsatna lian tham thleng a awm hriat a ni lo.
Nimin tlaia kawng sial tlang a nih hnuin tukin zing lam khan Dapchhuah hnaih, nimina an thenfai zawh chiahna ah bawk khan kawng a ping leh a, tunah hian lirthei/khualzin engemawzat an tang leh mek. Helai hmuna kawng ping leh hi thenfai harsa lutuk tur niin a lang lo a, a bulah hian hnathawk mai thei turin khawl chhawp sa a awm a, khawl enkawltute erawh an chauh deuh avangin an che zung zung thei rih lo niin Mamit Times thudawnna chuan a sawi.
Tuna kawng ping mek hi a thenfai chhung rei lo tura ngaih a nih thu kawng enkawltute chuan an sawi.
0 Comments