Indian Oil Corporation Ltd (IOC) chuan an Corporate Social Responsibility (CSR) fund 2024-2025 atangin National Health Mission (NHM) kaltlangin Mamit District Hospitala hman turin Kal thuah faina (Dialysis) khawl pali a rawn pe a, heng khawl pali hi Mamit District Hospitalah phurh thlen vek a ni tawh chungin bun (install) theih a la nih loh avangin District dang damdawi Ina hman tura lak chhuah leh a ni dawn.
Heng khawl pali zinga pahnih hi Serchhip District Hospitala dah tura tih niin phurh chhuah a ni tawh a, a dang pahnih la awm hi Champhai District Hospitala dah tura tih a ni leh bawk a, Mamit District Hospitala Dialysis khawl pali bun tura IOC in a pek chu lak chhuah vek a ni dawn ta a ni.
Hemi chunchangah hian Medical Superintendent Mamit District chuan heng khawl hi Mamit District Hospital building thara dah tura tih niin IOC lam chuan June thla chawhma lam thleng kha an nghah thu a sawi a, Hospital building hi luah luha khawl hi bun theih ala nih loh vang leh IOC lamin hman tangkai a ni tih hriatna (Utilization certificate) an phut tawh avangin a bun theihna tur hmun danga dah rih mai chu NHM thuneituten tha zawka an hriat vanga hetianga ruahmanna thar hi awm ta niin a sawi.
Nimin lam khan MJA Mamit District chuan NHM Director hmuin hemi chungchangt hi an sawipui a, Mamit District Hospitalah hian Dialysis khawl hi dah leh ngei a nih tur thu a lo hrilh a ni. Hetihlai hian Mamit District Hospitala dah leh tur Dialysis khawl hi khawi atanga lo kal tur nge tih erawh hriat mai a la ni lo a, IOC lamah hian a dang dilna lehkha a kal leh mek chauh nia hriat a ni bawk.
Mamit District Hospitalah hian Dialysis khawl bunna tura awm ngei ngei ngai- Reverse Osmosis (damlo hman tur tui thlitfimna khawl) neih sa a ni tawh a, hei hi NHM atanga dawn niin cheng nuai 15 man a ni.
0 Comments