National Highway No 6 (Spurs), Bairabi - Mamit siam hna thawk turin hmalakna kalpui mek a ni a, hna erawh mipui beisei anga thawh nghal mai theih a ni dawn lo.
Bairabi leh Mamit inkar kawngpui National Highway No 6 (Spur) a puan a nih hnuah he kawngpui hi double lane a siam turin hmalakna kalpui zui reng a ni a, mipui beisei ang leh mi then khatin an sawi anga hna thawh nghal vut vut theih erawh a ni lo a, hna tan turin tih fel ngai leh hmabak tam tak a la awm a ni.
He kawngpui (NH 6) kal dan tur leh hnathawhna tura ruahmanna kimchang, sum mamawh tur angte (DPR) siam fel tawh niin thuneitu sang lamah theh luh a ni tawh a, DPR hi endik mek a ni chungin paltlang ngai tam tak a awm avangin hun erawh a la duh deuh tura ngaih a ni.
NH No 6 in a paltlang turah mimal ram engang nge awm tih enfel hna (Preliminary Assesment) chu zawhfel a ni tawh a ni a, AAA notification tih chhuah hun nghah mek a ni. AAA Notification chhuah atanga Ni 21 hnu lam atangin kawngpui in a paltlang tura ram neitute ram hlut zawng, thlai leh In awm dan, zangnadawmna an hmuh theih tur zat enfel (Detail Asessment) a ni leh ang a, hemi hnuah Zangnadawmna atana sum sen ngai/mamawh (land aquisition DPR) hi MoRTH ah theh luh leh tur a ni ang.
Land Aquisition DPR hi kum 2025 chhunga theh luh hman an tum thu Pu Lalrinhlua SDO MPWD Highway Division I chuan a sawi.
SDO chuan NH No 6 kawng siam hna thawhna tura DPR siam fel tawh chu pawm a nih hnuah pawh zangnadawmna atana sum ruahman (land aquisition DPR) hi za zela 90 tal tihfel a nih phawt loh chuan hna thawh theih a ni dawn lo tih a sawi.
Mamit Times zawhna chhangin Pu Hlutea chuan he kawngpui sial a nih dawn avanga Forest clearance ngai tur ang ang pawh Parivesh Portalah dilna theh lut tura inbuatsaih mek a nih thu a sawi bawk.
Kawng thar, NH No 6 sial hna thawk thei tura hmalakna kalpui a nih mek laiin tuna kawngpui hmanlai mek thawm that hna erawh duhthusama kalpui theih a ni lo a, tun dinhmunah kawng hnawhna atana mamawh lung an hmuh hleih theih loh thu Pu Hlutea chuan a sawi a, theih ang anga kawng chhe zual lai an thawm ve reng thu a sawi bawk.
Tarlan tawh angin, he kawngpui hmanlai mek (Existing road) siamthatna tur hian Ministry of Road Transport & Highway (MoRTH) in dan thar a kalpui, Short Term Maintainance Contract (STMC) hmanga thawh turin cheng nuai 433 a ruahman a, Nidhi Creative Infrastructure Pvt. Ltd hmingin MPWD Highway Division ten thawkin Ni 9/March/2024 atanga hna tana chhut a ni a, hna hi kum khat chhunga zawhfel tura tih a ni.
0 Comments