Mamit District Hospitalah thawktu indaihlohna vanga harsatna a awm mek laiin thawktu pakhat Lalthanunpuii, Staff Nurse (Special Newborn Care Unit) NHM hnuai ami chu thlaktu awm loin sawn chhuah a ni dawn a, Kawrtethawveng PHC ah General Nurse anga thawk turin sawn a ni.
Lalthanunpuii, Staff Nurse hi District Hospital chauha post awm Special Newborn Care Unit (naupiang hlim enkawlna bik) hmuna thawk tura lak a ni a, hetiang post hi District Hospitalah chiah a awm chungin Kawrtethawveng PHCa thawk tura sawn chhuah a ni.
Lalremruati Fanai, Staff Nurse, (General) Kawrtethawveng PHC a thawk lai, National Health Mission hnuai a mi tho chu District Hospital Mamita Special Newborn Care Unit (SNCU) a thawk turin sawn a ni ve bawk.
Hetihlai hian, Lalremruati Fanai Kawrtethawveng atanga Mamit District Hospitala thawk tura sawnna chu sutleh a ni a, Mamit District Hospitala thawk lai Staff Nurse pakhat chu thlaktu awm loin lak chhuah a ni dawn ta a, Kawrtethawveng PHC ah hian Doctor pakhat leh Staff Nurse panga an awm dawn a, Kawrtethawveng PHC ah hian April 2025 chhung khan damlo 35 enkawl an ni.
Tun dinhmunah Mamit District Hospitalah Staff Nurse 19 an awm mek a, heng zinga pakhat hi sawn chhuah a ni ang a, nau nei tur chawlh la leh Voluntary Pensiona chhuak tur an awm bawk. Mamit District Hospitalah hian damlo khum 30 chuang a awm a, thla khat chhungin dam lo 100 - 150 vel enkawl thin anga ngaih an ni a, Mipa leh Hmeichhe awmna khum chu khat reng anga ngaih a ni. District Hospital Mamitah hian April 2025 khan damlo 132 enkawl an ni. Staff Nurse telloa tih theih loh inzai (Surgery) chi hrang hrang kartin Ni indawta tih thin a ni bawk.
Hetiang a nih avang hian Mamit District Hospitalah hian thawktu (Staff Nurse) indaihlohna zual hle tura ngaih a ni.
0 Comments