Govt. Mamit Collegea thawk lai Professor pali chu thlaktu awm loa sawn chhuah an ni a, heng Professor pali chhuak ta te hmun ruak hnawh khat tur hian aiawh dah an awm rih lo.
Govt. Mamit Collegea Professor mi pali - Zosangliana Zuala (English), Lalrinfeli (Education), Dr. Lianhmingthanga (Economics) leh Rohming-thanga (Mizo) te chu thlaktu awm loa sawn chhuah an ni.
Govt. Mamit College Principal mawhphurhna chelh mektu Pu Vanramropuia chuan hetia Professor sawn chhuah an nih takah chuan GMC ah thawktu indaih lohna a a nasa hle tih sawiin aiawh dah loa sawn chhuah sak lo tura thuneitute an ngen thute, sawrkar atanga thu dang a awm loh vanga professor sawn chhuah tak te hi kaltir mai lo thei lo an nih thu a sawi.
A bik takin tun dinhmun atanga thlirin, English leh Mizo subject ah phei chuan professor indaih lohna a nasa hle dawn a, Session tharah chuan tha taka zirna kalpui a harsa hle dawn nia a ngaih thu a sawi bawk.
Mamit bialtu MLA Pu H. Lalzirliana chuan Mamit Times zawhna chhangin heng professor pali, aiawh dah loa sawn chhuahte hi ennawn tura Higher & Technical Education Minister Dr. Vanlalthlana a sawipui tawh thu sawiin a tul ang zela ngaih ven zui a tum thu a sawi.
Sawrkar lai party hruaitu, ZPM Mamit Centre Block President Pu Selbuanga chuan heng Professor sawn chhuah takte hi aiawh dah loa sawn chhuak lo tura Minister hnena ngenna an thlen thu sawiin hmaichhanah erawh Minister hi an hmuh theih tak loh thu a sawi a, he an ngenna chungchangah hian sawrkar atanga thu leh hla engmah an dawn zui loh thu a sawi bawk.
MZP Headquarters Mamit hruaitute hnen atanga kan thudawn danin, heng professor sawn chhuah takte aiawh dah sak tura Minister hnena ngenna an lo thlen tawh thu leh MZP General Headquarters lam pawhin Minister an lo dawr tawh thu an sawi a, College hrang hranga thawktu indaih lohna nasatna hmunah thawktu dahbelh a ngaih vang leh naupang awm zat chhut chunga zirtirtu semrual a tul thuin sawrkar thuneitute chuan MZP Hqrs Aizawl hruaitute hi an lo chhang tih an sawi. MZP Hqrs Mamit hruaitute hi zanin lamah an thkhawm dawn a, tuna GMC Professor aiawh dah loa sawn chhuah chungchang pawh an ngaihtuah dawn nia hriat a ni.
Hemi chungchangah hian MNF Mamit Centre Block chuan nimin khan thuchhuah siamin heng professor sawn chhuah takte hmun ruak hnawh khat tur hi rang taka dah turin sawrkar an phut tih an tarlang a, sawrkar hmalakna chu Mamit District leh mipui intham lohna leh inhmuhsitna ah an ngaih thu sawiin sawrkarna chelh zui zel tlak loa an ngaihtu an sawi.
GMC Mamita thawk Professor pathum - English, Education leh Economics subject zirtirtute hi a rualin Ni 7/4/2025 ah khan GMC atanga chhuahtir an ni tawh a, Mizo Subject zirtirtu hi 13/12/2024 daih tawh ah khan chhuahtir a lo ni tawh a ni.
0 Comments