FOREST DAN PALZUT VANGA HREMNA ATANA PAWISA PEK NGAI Rs 189.72 LAKH PEK THEIH A NI DAWN TA

N orth Eastern Council (NEC) sum Rs 5495 lakhs/- (nuai sangnga zali sawmkua panga) hmanga hnathawh, Ni 19/4/2017 atanga hna tan, February 2023 a zawhfel vek tura tih, 132 Kv line hmanga Bairabi atanga kawlphetha lakluhna tur (Bairabi-W. Phaileng via Mamit) chu vawiin thlengin hman theih a la ni lo a, Forest dan zawm loh vanga hremna pawisa pek ngai Rs 189.72 lakh erawh Mizoram sawrkar Finance Department-in hman phalna a pe chhuak tawh.

Tarlan tawh thin angin, Bairabi atanga W. Phaileng thlenga 132kv line hmanga kawlphetha lakluhna tur hi kum nga chhunga thawh zawh vek tura tih a ni chungin kum sarih chuang ah pawh harsatna a la awm reng a, a tira pek loh forest clearance atan sum mamawh Rs 2,08,21,605/- (nuai zahnih pariat sing hnih sang khat zaruk panga) chu SEDP sum atangin kum 2023 ah pek chhuah a lo ni tawh a ni. (vide No. G. 21012/5/2021-CE(D)P&E/120 dt. 11/7/2023)
 

 Hetiang a ni chung hian Forest Act palzut vanga hremna  ; Penal Net Present Value, Ramri chhin-chhiahna senso leh Thing kihna man tura sum mamawh (hremna) pawisa pek tur a awm mai loh avanga hna kalpui zui theih a nih loh hnuin Ni 2/5/2025 khan Finance Department, Government of Mizoram chuan hemi atan sum mamawh Rs 189.72 lakhs hman phalna a pe chhuak ta a ni. (Vide No G. 20016/5/2025-FBT)
 

He sum pe tur hian tihtur hmabak eng eng emaw a la awm nual a, Administrative Approval, Executive Sanction te nawr chhuah ngai tur a la ni thung. Hei pawh hi chak taka umzui nghal tum a nih thu leh reiloteah hmuh mai theih beisei a nih thu Mamit Times thudawnna chuan a sawi.
 

132Kv line Bairabi - Mamit bikah hian hnathawh zui ngai hau tak deuh hmun riat velah a la awm tih Pu Jacob Lalrinfela EE P&E Mamit chuan a sawi a, Bairabi atanga a rawn luhna tur leh pek chhuahna tur Sub-Station erawh hman theiha peihfel thawkhat a nih tawh thu sawiin thual that ngai la awm pawh chak taka thawh a nih theihna turin Contractor an nawr reng tih a sawi.