Keini lam atang chuan tih theih a awm ta meuh lo nia ngaia lunghnur taka mipui an awm hnuah, Bairabi atanga 132kv line hmanga kawlphetha lakluhna tura hnathawh khaihlak pawh chhunzawma, he line hi mipui hman theih tura peih thuai a nih beiseina thar nung a awm leh ta. A lawmawm tak zet a ni. A tak taka chhawr theih a ni lo chungin vawi tam tak lawmna kut kan lo beng tawh a, he hna zawhfel leh tangkai taka hman zui a nih vanga lawmna kutbeng ri hriattur a awm ngei tawh turah ngai ila a tha ang e.
Sawi fo tawh thin angin he hna, a bilha tho lo, dan anga kalpui loh vanga harsatna insiamchawp tam tak paltlang ngai hian mipui rilruah beidawnna a siam hman a, sawrkar official lam lu tihaitu a tling a, thuneitu hrang hrang ten nasa taka dem an hlawh phahna a ni. Kha erawh a pawi hle. Mahse, hna lian leh hautak kalpui tur la awm zel turah a kalphung tur zawm hram hram a pawimawhzia min hmuh chiantirtu ni sela, lo sawh hek ve tur ringawt ngaihtuahna awm thei laka inven a tul zia min hriattirtu nise, chutiang avanga sawrkar leh mipui tawrhna thlen nasat theihzia min hmuh chiantirtu ni mawlh rawh se.
Tuna mipuiin thinlung taka lawmna kan neih theihna tura theih tawp chhuahtu mi hrang hrang - khawtlang hruaitu leh NGOs te an fakawm hle a, a bik takin nasa taka nawrtu P&E Departmenta officialte, Minister leh Mamita sawrkar official lo awm tawh ten Mamit hmangaihna tak tak nei chunga theih tawp an chhuahna rah chhuah a ni tih hria ila, an chungah lawm nachang kan hriat a ngai. He sum hmuh theihna tura theih tawpa nawrtu chu an ni hi an nih tlat avangin. Sawrkar laipui lamin a ngaihpawimawh si, State sawrkar tana tih harsa ni bawk si nawr tlang tura file innawr let reng kara tih tak zeta umzuitute hi fak loh theih an ni lo ang.
Vawiina kan mamawh hmasa ni ta chu, he hna hi chhunzawm theih tura ngaih (bel chhung sa ang) a lo ni ta a, pawisa inpek fel kher nghah ngai loa vawiin atanga a tul ang ang lo thawh chhunzawm theih leh thawh nghal hi a ni. Sum hmuh tak tak leh inpek fel chhung hian hun a la duh deuh mai thei e. Mitinin kan mamawhna leh a tulna hmu thiama fur pui thlen hmaa a hautak zual lai lo thawh theih a tul. Hemi kawnga thuneihna hrang hrang neitute pawhin mipui mamawhna zawn hria a an inhawn zauh deuh a ngai a ni.
0 Comments