Kan la tlai lo turah ngai ila

 Mamit khawpui chhung inenkawlna leh inrelbawlna hrang hrangah, hmun dang anga harsatna tawk thei dinhmuna ding kan nih dante , chutiang ang pumpelh tura hmalakna kalpui a tul thute hman atanga mi thahnemngai ten an sawi thin a ni a, khawpui ruangam tur ruahmanna fel tak awm lo vanga mipui harsatna tawh theih nia an sawi pawh tunah chuan a takin kan tawng chho mek a, a siamtha tur leh harsatna sukiang turin awmze neia hmalak a harsa tan a, dan leh hrai khawng taka kengkawh turin mihring mihrinna atanga inhmaizahna leh inhriatthiamna awm lo thei lote pawhin kan harsatna a belhchhah ve mek a nih hi.

Kan kawngpui tih zauh ngaihna kan hre meuh tawh lo a, lirthei a pung a, lirthei dahna (garrage) nei nia inchhal ten kan lirthei kan dah felfai thei chuang lo a, harsatna a thlen hnuah thuneitute kan kawk a,kan dem bawk a, khawng taka dan leh thupek an lek veleh kan leh huat leh lawi si thin. A thiam lo hmasa chu mipui kan ni a, hman atanga nakin hun kan ngaihtuah thlen loh vangte, duhamna vangte, pawisak kan neih loh vangte in a rah chhuah a ni. Kan tihsual tawh rah chhuah a nih tlat a vangin tawrh a ngai a nih pawha tuar ngam tur kan ni awm e.

Tun huna thuneituten thupek an chhuah hi khawng takin kengkawh sela, thupek chhuaha duh tawk mai loin, a enzui kawngah tan la sela, a hlawhtlinna hmuh tur awm ngei rawh se.

Hei mai hi a la ni lo, kan khawpui hming pu ve hi a la thang zel dawn, mihring kan pung ang a, In leh lo, lirthei leh thil dang dang a pung ang. Harsatna thleng zel thei pumpelh tura ruahmanna felfai siam a ngai. Kan la tlai chhe lutuk lo ang. Khawpui awmze nei din tura ngaihtuahna hmang thei mihring kan mamawh zia a lang chho mek.

Khawpui dang ten harsatna an tawh leh hnam anga inchimralna awlsam tak ni bawk, khua-leh-tuite hamthatna inluahlan theihna awlsam tak - sumdawnna hrang hranga kan vawiin dinhmun hi chik a ngai. “Eng tham a ni lo e” emaw “a pawina a awm lo e” tia kan en liam chhung hian thuk takah zung a lo kaih tawh thin a, a zungin kan duh loh leh rin loh thleng thleng a lo phuar tel tawh chinah keimahni leh keimahni bawk kan inhmachhawn ang. Meipui a nih hnua thapui thawh a, nunna thap ngai hial khawpa thelh mih tum ai chuan, mei si a nih laia awlsam taka tihhlum a tha zawk.