North Eastern Council (NEC) sum Rs 5495 lakhs/- (nuai sangnga zali sawmkua panga) hmanga hnathawh, Ni 19/4/2017 atanga hna tan, February 2023 a zawhfel vek tura tih, 132 Kv line hmanga Bairabi atanga kawlphetha lakluhna tur (Bairabi-W. Phaileng via Mamit) hnathawh a Forest dan zawm loh vanga hremna pawisa pek ngai chu pek fel a ni.
132Kv Line, Bairabi - W. Phaileng via Mamit hnathawh ah sum pek ngai chi hrang hrang a awm a, harsa tak chunga sum ngaihtuah a nih hnuin Forest dan zawm loh vanga hremna (Penal Net Present Value) atana sum chawi ngai cheng nuai 189.72 hman phalna Mizoram sawrkarin P&E hnenah Ni 2/5/2025a a pek chhuah hnuin Ni 23/5/2025 (Zirtawpni) khan heng sum hi EF&CC hnenah pek fel a nih tawh thu Pu Jacob Lalrinfela EE, P&E Mamit chuan a sawi.
Mamit Times zawhna chhangin Pu Jacoba EE P&E Mamit chuan EF&CC hnena sum pek ngai (PNPV) pek fel a nih hnu Ni 24/5/2025 Inrinni atang khan hrui pawh theih tura hnathawh ngai ang ang thawh tan a ni thu a sawi a, hrui la pawh lohna Mualpui peng leh Dampui Bazar inkar pawh vawiin atang chuan hrui pawh hna thawh tan beisei a nih thu a sawi.
Hemi chungchanga Mamit Times zawhna chhangin Pu C. Lalrinmuana DFO Mamit Division chuan P&E Deptt. chu hna thawk tan thei tawh tura ngaih an nih thu a sawi. Chutihrual chuan, Forest dan zawm loh avanga sum pek ngai an pek har avanga a pung awm (simple Interset) Rs 32,15,940/- (cheng nuai sawmthum pahnih singkhat sang nga zakua lawm li) chu P&E hian an pek leh a la ngai dawn tih a sawi.
Penal NPV hi Ni 13.9.2023 atanga chhut niin thla 20 chhunga a pung @ 12% per annum a ni a, pawisa pek har avanga a pung Rs 32,15,940/- hi pek a la ngai dawn a ni.
Tarlan tawh thin angin, Bairabi atanga W. Phaileng thlenga 132kv line hmanga kawlphetha lakluhna tur hi kum nga chhunga thawh zawh vek tura tih a ni chungin kum sarih chuang ah pawh harsatna a la awm reng a, a tira pek loh forest clearance atan sum mamawh Rs 2,08,21,605/- (nuai zahnih pariat sing hnih sang khat zaruk panga) chu SEDP sum atangin kum 2023 ah pek chhuah a lo ni tawh a ni. (vide No. G. 21012/5/2021-CE(D)P&E/120 dt. 11/7/2023)
Hetiang a ni chung hian Forest Act palzut vanga hremna ; Penal Net Present Value, Ramri chhin-chhiahna senso leh Thing kihna man tura sum mamawh (hremna) pawisa pek tur a awm mai loh avanga hna kalpui zui theih a nih loh hnuin Ni 2/5/2025 khan Finance Department, Government of Mizoram chuan hemi atan sum mamawh Rs 189.72 lakhs hman phalna a pe chhuak ta a ni. (Vide No G. 20016/5/2025-FBT)
0 Comments