Mizoram Journalists’ Association Mamit District memberte chuan nimin Ni 5/12/2024 khan Pu H. Lalnunsanga EE P&E Mamit Division chu a Pisa-ah hmu 132kv line Bairabi - W. Phaileng via Mamit hnathawh mek dinhmun an sawipui a, harsatna leh hmalak mek a nih dan sawiho a ni.
EE P&E Mamit Division Pu Sangtea chuan 132 kv line hnathawhna ah, sawrkar laipui lam atanga Forest Act palzuta puh an nih chungchang leh hemi avanga hremna chawi ngai an tih ngaihhnathiam an dilna chungchangte chu chinfel a la nih loh thu a sawi a, hremna atana sum pek ngai cheng nuai 189.72 chu hmuh a la nih loh thu a sawi bawk.
Bairabi lam atanga 132 line hmang eng lakluhna tura harsatna awm mek chu Chief Minister’s Office lamte, P&E Department leh Forest department lam ten theih tawpa an umzui zel thu a sawi a, tunah hian sawrkar laipui pawhin a umzui mek nia an hriat thu a sawi.
Tarlan tawh thin angin, Bairabi atanga Mamit kaltlanga W. Phaileng thlenga Kawlphetha lakluhna tur, NEC sum Rs 5495 lakhs senga hnathawh, kum 2017 atanga hna tan, February 2022 a zawhfel vek tura tih chu vawiin thlengin zawhfel theih a la ni lo a, hna kallai mek pawh harsatna lian tak tak avangin chawlhsan lailawk a ni.
He hna thawh a nih hma kum 2015 ah Mizoram sawrkar Forest Department lam atangin No Objection Certificate (NOC) pek chhuah a ni a, hna thawh mek laiin kum 2018ah Forest Department atang bawkin NoC chu cancel leh a ni. Forest Clearance atana sum pek ngai Rs 2,08,21,605/- chu Kum 2023 chawhnu lam khan pek fel a ni tawh a, tunah hian Forest Act palzuta puhna vanga hremna leh thil dang dang vangin cheng nuai 189.72 pek leh ngai a la awm.
0 Comments