Nimin Ni 5/12/2024 chawhnu dar 1:00 khan Mamit Bazar venga Chawhmeh vawn thatna tur Cold Storage chu Mamit District Bawrhsap Pu K.Laltlawmlovan a hawng.
District Bawrhsap Pu K. Laltlawmlova chuan hetiang ang hmun pawimawh leh tangkai tur hawn theiha peih a ni ta chu lawmawm a tih thu a sawi a, a chhiat thatah a hmangtu ten mawhphurhna sang tak an nei tih sawiin kan hman zui thiam leh thiam lohah a tangkai leh tangkai lo a innghat dawn a ni a ti.
Mamit khawpui chhunga chawhmeh vawn thatna (Cold Storage) a awm theihna tur hian kum 2022 kum laihawl vel atang khan ngaihtuahna hman leh hmalakna kalpui a ni a, sawrkar laipui atanga sum hmuh a nih hnuin building hlui thiat a cold storage bunna tur hi thawh tan a ni a, building hlui (bazar shed) hi Ni 9/6/2023 khan thiah tan a ni.
Shri Umakant IFoS Jt. Secretary (WM) Gov't Of India, Central Prabhari Officer for Aspirational District in Kum 2022 July thla a Mamit a tlawh tum khan Cold Storage mamawh a nih thu hi Pu Thakima, VCP Bazarveng hian a lo thlen a, Jt. Secretary (WM) Gov't Of India, Central Prabhari Officer for Aspirational District chuan PM Gati Sakti Special Assistance atanga ngaihtuah theih a nih a beisei thu a sawi chu Deputy Commissioner’s Office leh District Horticulture Office Mamit ten chak takin an bawhzui a, DPR siam niin Secretaries Meetingah khatih hunlaia Mamit District Bawrhsap Pu Lalnunhlua chuan Presentation a pe a, Interim approval hmuh a nih hnuin sawrkar laipui thuneitute nen Video Conferencing hmanga meeting neihah Pu Lalmalsawma Pachuau, State Prabhari/Secretary Planning & Programme Implementation Depatment chuan presentation a pe leh bawk.
He cold storage bunna turah hian Mizoram chhungah ngei pawh harsatna tam tak suttlang a nih hnuah PM Gati Sakti atangin sum hmuh a ni ta a ni.
Building hi a dung 67 ft leh a vang 13 1/2 ft a sak a ni a, Ground floor ah hian bazar shed leh Deep freezer lian pali leh generator lian dah a ni. A chungah Solar hmang cold storange 15 metric tone dah theihna pahnih awmin thlai chi hrang hrang dah theih a ni a, smart phone atang a thlai dah turte application hmanga dah belh theih tura ruahman a nih bakah, phone hmanga on/off theih a ni.
Cold storageah hian thei, thlai rah plastic bawm khat hi zan khat dah manah Rs 10 ani a, Thlai hnah lam chi plastic bawm khat zan khat dah man Rs 5 a ni ang, Sa hi 2kgs zelah zan khat dah man hi Rs 2 a ni ang.
0 Comments