Mamit District paltlang tur, dan loa Vawk phurh, ASF hri kai thahnem tak man a ni a, hetianga dan pawisa lo leh mipui tawrhna thleng pawisa hauh lo khawpa mahni hmasialna avanga sum umtute chet lakna hi a demawm a, a mantu leh an chunga dan anga thuneihna kengkawhtute erawh an fakawm tak zet a ni.
Vawk hri (ASF) inkaichhawn dan leh a darh theih dan chu mi zawng zawng hriat khawpa sawi tam a ni tawh a, ran vuhtute tawrhna a nasat theih zia pawh a tak ngeiin vawi duailo kan hmuin kan hre tawh a ni. Heti chung pawha thuneitute thupek pawisa lo leh mipui tawrhna thleng thei hmu duh lo khawpa mahni hmasialte hian dan anga an chunga rorelna an hmuh hi an phu ve reng a tih theih awm e.
Mipui nawlpui himna tur leh kan khawsakhona kawnga kan that tlanna turin thuneituten khapna thupek an chhuah thin a, Dan leh thupek kenhkawhtuten chu chu an enzui tur a ni. Chutihrual chuan, dan bawhchhia an awmin, an laka hremna lek a nih theihna tura dan leh thupek kengkawhtute hnena hriattir hi mitin mawh, kan tihtur a ni tih i hre thar zel ang u. Chu chu dan leh thupek kengkawhtute kan puih theihna awlsam tak a ni.
Hman lai atanga kan inzirtirna dik tawk lo, inhekna anga ngaia a titu nih hreh tlatna awm thin pawh kan paih deuh deuh a tul. Hetiang thila thuneitute thawhpui hi inhekna a ni hauh lo a, mipui nawlpui himna tura thawhhona tha siamtu, kan tanrual theihna a ni tih hrereng ang u.
0 Comments