Mizoram puma VB- G RAM G hnuaia thawk intelkhawm pawl AMGEA chuan 18th August 2026 hian an Department changtu Minister, Prof. Lalnilawma hnenah lehkha thehlutin thla 5 hlawh an lak tawh loh avanga an harsatna tawh thu leh chhungkua chawm tura inhlawh turin 24th August 2026 (Thawhtanni) atanga office hna an thawh chhunzawm theih tawh loh tur thu an sawi.
VB-G RAM G hi mipuiten MGNREGS tia kan hriat lar tak mai CSS hming thar a ni a. A hnuaia thawktute hian Kum 2024 March thla atang khan an thawh hlawh te a hun taka lak an nei thei ta meuh lova. Thla 3 / 4 danah hlawh hi an la thin a, chutah pawh chuan an lak loh thlate hi a kimin an la ngai lo thin tih thu dawn a ni. Kumin 2026 March thla atanga nimin, 18th August 2026 thleng hian hlawh hi an la la thei lova, an mangang takzet tih an sawi.
Hetih lai hian “RD&A Dept chuan 6th August 2026 khan a hnuai a thawk VB G-Ram-G employee ho hlawh tur chu release order a ti chhuak vek tawh a, tunah hian pek tura process mek a ni a, heti chung hian Social Media ah Sawrkar leh RD&A Dept chhuahchhe zawngin thu post darh mek a ni” tiin kan thulakna chuan a tarlang.
“Tunhma a MGNREGA chu VB G-Ram-G a thlak a ni a, VB G-Ram-G hnuaiah hian Central Sawrkar in tun hma a an kal dan system leh sum in pek dan kalphung/ System hi nasa takin an thlak danglamin, RD & A Deptt mai bakah Department dang bakah IFMIS khawihtu Private Firm te, NIC te thlengin a kaihhnawih a. Chuvangin Payment System thlak danglam (transitional period anih avangin) avang hian duh ang in a process a kal chak thei lo a. State Sawrkar pawh hian fimkhur takin thil a kalpui/process chho mek zel a ni” tiin a tarlang bawk.
Heng VB G-RAM-G hnuaia thawktute hlawh tur leh Office mamawh atana hman tur hian Office lehkha No B. 11015/8/2026 RD&AD (VB-G RAM G)/1 (Salary & OE) Dated 6th August 2026 hmangin Rs 132618435/- pek chhuah a ni tawh.
0 Comments