Kum 2023 September Ni 26 a hawn, cheng vaibelchhe 17.934 senna, Mamit District Hospital khum za awm theihna tura duan chu tunlai hian chei that/siamthat hna thawh mek a ni, he hnathawh hi July thla tawp lam atang khan tan a ni a, September 2026 ah chuan zawh fel theih beisei a ni.
Khum za awm theihna tur, Mamit District Hospital hi hawn a nih atanga kum thum kal mekah pawh luah luh theih a ni loa, tun dinhmunah luah luh theih tura siamrem hna thawh mek a ni. Damlo awmna tur ward then khat chu chhut chhiata siamthat leh niin awmze nei zawk leh damlo leh thawktute tana tha zawk tur anga siamrem mek a ni a, inthiarna siam belh leh electification siamthat ngai siamthat hna thawh a ni bawk.
Hospital building thar siamrem/siamthat hnathawhna atan hian District Hospital pawisa, Rogi Kalyan Samiti (RKS) (Patient Welfare Committee or Hospital Management Committee) hman a ni a, he hnathawh mek hi cheng nuai sawmthum vel senga zawhfel theih beisei a ni.
Tuna Damdawi In building siamthat hna thawh zawh a nih veleh hian luah luh nghal tum a ni a, khum 50 dah phawt tura ruahmanna siam a ni a, Cabin pathum (pakhat thawktu pual) leh District Hospital Staff bikte damloh nikhuaa enkawlna tur Staff sick room siam tel a nih theihna tura ngaihtuahna hman mek a ni bawk.
Dr Malsawmsanga Khiangte, District Medical Superintendent, Mamit District Hospital chuan District Hospital building tharah khum 50 dah phawt tum a ni a, hemi enkawl tur hian thawktu hrang hrang mamawh belh a nih tur thu Mamit Times zawhna chhangin a sawi.
0 Comments