Nimin khan Dr. Lalrozama, IAS, Commissioner & Secretary, H&TE leh Mamit Electoral Roll Observer ni bawk chuan a vawihnihna atan Mamit tlawhin DC Conference Hall, Mamit-ah Mamit district a SIR 2026 hearing kalpui mek thlirhona neiin harsatna leh hmachhawp te sawiho a ni.
Dr. Lalrozama chuan Mamit district a SIR hearing hlawhtling taka kalpui zel a ni chu lawmawm a tih thu sawiin election officials te leh NGO, political party leh khawtlang hruaitute thawhhona tha a lantir a ni a ti a. Ruahtui tam lai a nih angin in kalpawhnaah ERO, AERO leh BLO ten harsatna tam tak an tawka, chumi kara an mawhphurhna tha taka an hlen thei chu fakawm a tih thu a sawi. Mamit electoral roll Observer chuan NGO, political party leh khawtlang hruaitute chu hearing kalpui mekah hian an pawimawh hle a ni a ti a, dik leh fel takin hotuten hearing an kalpui em, inhrilhhriatna a tha tawk em tih thlenga lo hre tu an nih angin harsatna awmte chu a rang lama hotute hnena thlen turin a ngena, in tawiawm thaa thawhhona tha neih zel turin a chah a ni.
Pu Suvigya S Chandra, District Bawrhsap leh DEO ni bawk chuan hun kaihruaiin he hmalakna pawimawh tak kalpui meka theihtawp chhuahtu election officials, NGO leh khawtlang hruaitute hnenah lawmthu sawiin thawhhona tha nei zel turin a chah.
Nimin thutkhawmah hian Pu Lalnunfela Chawngthu, Election Officer chuan Mamit district a hearing kalpui mek chungchangah report pein harsatna liantham awm loin hlawhtling taka hearing kalpui mek a ni a ti. ERO te chuan report pein an harsatna te Observer hnenah an thlen.
0 Comments