Ni 30/4/2026 khan SP Conference Hall, Mamit-ah Mamit District Police te chuan District Level Conference an hmang a. Mamit District chhunga SDPO te leh Police Station hrang hranga Officer-In-Charge te leh Investigating Officer te kalkhawmin, district chhunga dan leh thupek kenkawhna kawnga hmasawn dan turte, Mamit District chhunga rukruk leh sualna thleng hrang hrangte tih rem dan turte sawi ho a ni.
Pu Manny Bushan Singh, SP Mamit chuan kumin chhunga Mamit District crime data tarlangin, case 51 ziah luh tawh zingah rukruk case a tam ber thu a sawi a. Heng zinga case 29 te chu chargesheet tawh niin case dang chu chhui mek leh chargesheet theih mai turte an ni tih a sawi a.
SP chuan Mamit District chhunga rukruk hluar mekah zan leh chhun reh lai te, Pathianni ah te police te patrolling uar turin a chah a, police in portal hrang hrang kan neihte hmang tangkai turin a chah bawk. Rukrutu chauh hrem lova, an thil ruk ngei a ni tih hrechunga leitute hrem tel ngei an tul thu a sawi bawk. Dan thar hriat a tul thu tarlang telin, dan thar chungchang te, rukruk leh sualna dang hluar mek laka mipuite himna turte mipui, thalai leh school naupangte'n an hriat theihnan awareness campaign uar turin a chah. Police chu mipui rawngbawltu an nih anga harsatna nei an hnen rawn pantute chu hawihhawm taka lo dawngsawnga, an harsatna su kiang tura theihtawp chhuahpui thin turin a chah a. Sub-division hrang hranga police te inpumkhat leh inlungrual taka thawk ho turin a chah bawk a ni.
He hun kaihruaitu Pi C.Lalbiaksiami,Additional SP Mamit chuan police hna chu eizawnna mai nilo, mipui rawngbawlna pawimawh tak a ni tih hria a theihna zawng zawng hlan chunga thawh tur a nih thu a sawi a. Tunlai thiamna mil zela police-te in her rem zel a tul thu a sawi bawk.
0 Comments