Mamita Tlawmngai pawl leh lirtei hmanga eizawngtuten kawngpui chhe lutuk thawm that a nih theihna tura sawrkar kar nana lirthei lut leh chhuak dang tura ruahmanna an lo siam tawh chu tukin zing dar 7 atang khan tiam chin awm lo turin kalpui tan a ni.
Lirthei lut leh chhuak dan chungchanga Mamit Times zawhna chhangin Pu Vanlalremruata, Chairman All NGOs & Commercial Vehicle Association chuan mipui harsatna siam zawnga hmalakna kalpui chu an tum hrim hrim a nih loh thu leh kawngpui chhe lutukin ngaihven a hlawh a, thu mai ni lo, a taka hmalakna hmuh ngei a nih theih an beisei vanga an ruahmanna awm tawh kaltlangpui an nih thu a sawi a, nitin khawsak phungah harsatna kan tawk a nih pawhin, kan zavaia that tlanna tur beisei vang a ni tih hriaa dawh hram hram turin mipuite an ngen tih a sawi bawk.
Tlawmngai pawl leh lirtheia eizawngte hmalakna kalpui mek chungchanga Mamit Times zawhna chhangin Pu H. Zoramliana E-in-C MPWD NH chuan kawngchhia vanga hmalakna kal mek leh mipui rilru a hriatthiampui thu sawiin kawng chhe thawm hna vawiin atanga chak taka thawh nghal a nih tur thu a sawi a, Rawpuichhip lam leh Darlak lam atanga Lung (Boulder) an lak tur thu leh khawl dah belha hna thawh nghal a nih tur thu a sawi a, a tak ngeia hnathawh hmuh an beisei chu a thlawn lo ang tih a sawi.
Kawngchhe thawmna tura sum hmuh cheng vaibelchhe 11 chu contractor thlan fel chiah la ni lo mahsela, hemi behchhan hian hna kalpui a nih tur thu a sawi a, NH 44A hna thawh zawh loh thawh zawhna tura sum pek chhuah tawh, Tender koh tawh leh STMC (2025-2-26) hmanga Bairabi - Mamit kawng siam tur pawh a rang lama hna tan a nih theihna tura MoRTH lamah pawh an umzui reng thu E-inC chuan a sawi bawk.
0 Comments