Sawrkar laipui ruahman anga sawrkar hna hrang hrang kalpui mek hnuaia thawktuten sawrkara an thil phut tihhlawhtlinna tura nawrhna an huaihawt avangin Mamit District Hospital leh Zirna In hrang hrangah harsatna a thleng mek.
Mamit District Hospitala thawktu tam tak hi CSS hnuai atanga chhawr leh thawk an ni a, lungawiloh vanga nawrhna an latir hian District Hospital OPD leh IPD nasa takin a nghawng a, inentirna hmun hrang hrang kal thei loin khar mek a ni. Hriat theih chinah Mamit District Hospital hnuaia pawimawh tak tak heng - X-Ray, NETP, RMNCH+A, NPPCD, NTCP, NVHCP, NMHP NCD ah te hian thawktu an awm loh avangin hnathawh theih a ni lo a ni.
Damlo enkawl kawnga pawimawh berte zing ami Nurse engemawzat lungawilo zingah an tel avangin tun dinhmunah Mamit District Hospitala damlo awm (In-patient) te nurse pariatin an vil a, damlo damdawi In a admit ngai an awm ve reng tho avangin District Hospital khum a khat deuh reng a, Nurse awm chhunte hi an indaihlo in an rim tawng hle niin kan thudawnna chuan a sawi.
Hetiang bawk hian CSS hnathawktute nawrhna avang hian Mamit District chhunga Zirna In tam takah pangngai taka zirna kalpui a harsa hle tih Pu K. Lalnunfela, DEO Mamit leh DPC Samagra Mamit Dstrict ni bawk chuan a sawi.
Mamit Times zawhna chhangin Pu K. Lalnunfela, DEO & DPC Samagra Mamit District chuan sawrkar thupek anga zirna In hawn leh zirna kalpui vek tur a nih avangin zirtirtu kal tur awm lohna school engemawzatah hmun dang atangin zirtirtu pakhat te dah an ni a, Elementary atanga Higher Secondary school thleng a nghawng a, dan pangngai ang taka zirna kalpui theih a nih loh rualin zirna In khar tawp erawh a awm lo tih a sawi.
Hetiang anga lungawilohna lantir vanga thil thleng a awm hma pawh hian, Mamit District chhunga Zirna In hrang hranga thawktu tura lak leh Mamit District atanga hlawh la, an hna ber Mamit District tana thawk thei loa hmun dang/District dang a pawhpen tak daih zirtirtu 152 zet an awm a, Zirna In zirtirtu pakhat chiah awmna 26 lai awmin zirtirtu awm miah lohna Zirna In pali lai awm tih DEO&DPC Samagra chuan a sawi bawk.
0 Comments