Tun dinhmunah Mamit Districtah Civil Sub-Division pathum leh RD Block pali a awm mek a, Kum 2025 January thlaa Village Council Electoral Roll hnuhnung ber tlangzarha tarlan a nih danin Mamit District chhungah In 20158 a awm a ni. Mihring puitling, vote nei thei zawng zawng mi 63710 an awm a, Village Council nei thei khua 92 an awm bawk.
Kum 2018a sawrkar laipuiin Aspirational Districts Programme (ADP) a kalpui atangin Mamit District hi sawrkar laipui tehnaah India ram chhunga District chenbeh/hnufual, tihhmasawn ngai District zingah a tela, theih tawp chhuaha hmalakna kalpui a ni a, vawiin thlengin he dinhmun atang hian a la tal chhuak thei rih lo a ni.
Hetiang hi vawiin thlenga kan dinhmun a nih laiin Mamit District hian District anga inrelbawlna a kalpui kum 25 tlin a lawmna pawh kum hnih lai a liam leh tawh thung. Hemi in a lantir chu, a chhunga cheng mihring dinhmun, eibar zawnna, sumpai deh chhuah a that loha, mipui nitin mamawh hnianghnar hmuh leh neih a nih si loh chuan District nihna ringawt hian hmasawnna a thlen ruak ruak lo tih a hi a ni awm e.
District thar siam belh hian loh theih loha ken tel ngai tam tak a nei a, chungte pawh chu neih/hmuh kim harsa tak a ni thung. State Sawrkar sum sen ralna tur tam tak a keng tel a, sawrkar sum dinhmun siamtha zawnga mipuiin thawh ve kan neih mumal siloh a, a chhunga cheng ten kan zir bawk siloh chuan, “hei chen District kan ni tawh a, kan rualpuite kan pha lo” tih chu kan thunawn a ni kumtin lo thei lo a ni.
Mamit District then hran duhna leh tumna lam hawia ngaihtuahna a awm mek a, hmasawn duhna atanga chhuak a ni. Kan dinhmun dik tak hmuchiang turin ngaihtuahna hmang ila, District then darh hi enge kan an pui ang (?) tih ngaihtuah tel a tha awm e. Kan State sawrkar dinhmun thlir chungin a nghawng tur ngaihtuah tel a pawimawh em em bawk ang.
Vawiin atanga sawi rik faih faih awm hian kum 2028 a lo her chhuah hunah meuh chuan, politics a na taka inbeihna leh inkarna hmanrua atan kan hmang dawn ni pawhin a ngaih theih awm e. Chutih lai chuan, kan State sawrkar sumpai dinhmun leh inrelbawlna hi kum 2/3 chhungin a kang dawrh dawn lo tih erawh a chiang thung. Pet goal tum leh goal vengtu an awm ngei a ngai dawn niin a lang a, State sawrkar dinhmun ngaihtuah chung zela thutlukna siam a pawimawh reng ang.
Vawiina Mamit District pum dinhmun ni mek hi ngun takin ngaihtuah ila, then darh tham leh then darh tlak a ni em (?) tih ngaihtuah ang u. A chhunga cheng mek mipui dinhmun thlir chungin, sawrkar kut ringawt nghak loa innghahna tlak hmasawnna thawk chhuak thei tur kan ni em (?) tih pawh ngaihtuah tel a tul ang.
0 Comments