DAMDIAI BUL KAWNG KHUAR HNAWH ZO, SUARHLIAPAH JCB DAH A NI

 

Mamit leh Bairabi inkar kawngpui, National Highway Division III ten an enkawl chhunga kawng khuar chhe zual lai hnawh chu zawhfel a ni.

Mamit leh Bairabi inkar kawng National Highway No 6 (Spur) kawng chhe zual lai thawm hna chu theih ang anga thawh a ni a, MPWD National Highway Division III te enkawl huam chhung a mi, Bairabi lam atanga Damdiai thlen hma 1km vela kawng khuar chhe lutuk, lirthei tan fona chu kar kalta zirtawpni atang khan hnawh a ni a, nimin Ni 14/7/2025 khan hnawh zawh a nih thu Pu Joseph Laldintluanga SDO MPWD NH Division III chuan Mamit Times a hrilh.

SDO MPWD NH Division III chuan tun dinhmunah khuain a zir/zirloh avangin lung (boulder) vawm khah mai bak chu tih ngaihna a awm rih lo niin a sawi a, Bairabi leh Damdiai inkara lirthei tangkhang emaw, leimin vanga kawng then ngai emaw a awm pawha rang taka thawk thei turin Suarhliapah khawl (JCB) an dah tih a sawi a, hei hi lirthei veivak hatsatna tawk an awm pawha hman theih tura ruahman a nih thu a sawi.

Hetihlai hian, Suarhliap khuaa JCB an dah hi zan khaw thim lai, Inrinni leh Pathianni ah erawh hman theih a nih dawn loh thu sawiin hei hi lirthei veivak ten hriatpui tura a duh thu a sawi bawk.