National Highway No 6 (Spur), Bairabi leh Mamit inkar kawngpui chhe lutuk avangin lirthei tan kal a harsa a, lirthei rit phur chu an kal ngam meuh tawh lo a ni.
Tarlan tawh angin he kawngpuiah hian lirthei tana kal tlang hleih theih loh - Bairabi atanga Damdiai thlen hma ah hmun khat leh Vawngawnzo leh Bualzau inkarah hmun hnih vel a awm a, hetiang a nih avang hian tuialhthei phur motor an kal rih dawn lo. Hetihlai hian, C.L. Filling Station Mamitah Petrol lak tur a awm tawh lo a, kawng a ziaawm deuh a nih loh chuan tuialhthei phur an kal dawn rih lo tih C.L. Filling Station neitu Pu C. Lalrinsanga chuan Mamit Times a hrilh.
He kawng hi Mizoram PWD Highway Division I & III ten an inenkawl sem a ni a, Mamit leh Damdiai inkar hi Mamit lam atangin NH Division I in an enkawl a, Damdiai leh Bairabi inkar hi Kolasib lam atangin NH Division III ten an enkawl ve thung.
NH Division III ten an enkawl chhunga kawng chhe zual lai, lirthei tan fona, Bairabi lam atanga Damdiai thlen hma 1Km vel ami chu hnawh turin hmalak mek a ni a, vawiin khan Boulder trip thum dah niin naktuk lam atangin an hnawh nghal ang.
Hemi chungchanga Mamit Times zawhna chhangin SDO NH Division-III chuan tuna an lung neih hian a daih lo deuh a rin a nih thu a sawi a, khua a ziaawm chhoh chuan lung (boulder) lak tur a awm chhunzawm mai an beisei tih sawiin theih ang anga chhunzawm zel tum a nih thu a sawi.
0 Comments